भरधाव टाटा एसची दुचाकीला धडक; एकार्जुनातील युवक गंभीर जखमी.

भरधाव टाटा एसची दुचाकीला धडक; एकार्जुनातील युवक गंभीर जखमी

वरोरा : आलीशान हॉटेलसमोर अपघात; गंभीर जखमीवर चंद्रपूरच्या सामान्य रुग्णालयात उपचार सुरू

वरोरा, दि. 6 सप्टेंबर २०२६ : वरोरा-वणी मार्गावरील आलीशान हॉटेलसमोर भरधाव व निष्काळजीपणे येणाऱ्या टाटा एस वाहनाने दुचाकीला धडक दिल्याने दुचाकीस्वार गंभीर जखमी झाल्याची घटना शुक्रवारी सकाळी घडली. या प्रकरणी वरोरा पोलिसांनी वाहनचालकाविरुद्ध गुन्हा दाखल करण्याची प्रक्रिया सुरू केली आहे.

याबाबत प्रमोद विठ्ठल थेरे (वय ४७, रा. एकार्जुना, ता. वरोरा) यांनी वरोरा पोलीस स्टेशनमध्ये तोंडी तक्रार दिली आहे. तक्रारीनुसार, त्यांचे मेहुणे विनोद बालाजी निमकर (वय ४०, रा. एकार्जुना) हे वर्धा पॉवर प्लांट येथे नोकरीस असून शेती व्यवसायही करतात. त्यांच्या मालकीची हिरो पॅशन मोटारसायकल क्रमांक MH 34 AJ 3983 असून ते स्वतः ती वापरत होते.

दि. ४ सप्टेंबर रोजी सकाळी सुमारे ७ वाजताच्या दरम्यान, विनोद निमकर हे एकार्जुनाहून वरोरा मार्केटकडे दुचाकीने जात असताना आलीशान हॉटेलसमोर वणीकडून वरोऱ्याकडे येणाऱ्या टाटा एस वाहन क्रमांक MH 39 BE 2846 च्या चालकाने वाहन भरधाव व निष्काळजीपणे चालवून त्यांच्या दुचाकीला धडक दिली.

या धडकेत विनोद निमकर हे रस्त्यावर पडले असून त्यांच्या डाव्या हाताला व कमरेला दुखापत झाली. अपघातानंतर त्यांना नातेवाईकांनी उपचारासाठी उपजिल्हा रुग्णालय, वरोरा येथे दाखल केले. तेथे प्राथमिक उपचार केल्यानंतर त्यांच्या कमरेला गंभीर दुखापत झाल्याने त्यांना पुढील उपचारासाठी चंद्रपूर येथील सामान्य रुग्णालयात रेफर करण्यात आले असून त्यांच्यावर उपचार सुरू आहेत.

या अपघातास टाटा एस वाहनचालकाचा भरधाव व निष्काळजीपणा कारणीभूत असल्याचे तक्रारीत नमूद करण्यात आले आहे. याप्रकरणी संबंधित वाहनचालकावर योग्य ती कायदेशीर कारवाई करण्यात यावी, अशी मागणी तक्रारदार प्रमोद थेरे यांनी वरोरा पोलिसांकडे केली आहे.

पुढील तपास वरोरा पोलीस करीत आहेत.