खापरी-टाकळी परिसरात अवैध दारूविक्रीवर कारवाई; २४ पव्वे जप्त, दोन्ही संशयित आरोपी पोलिसांच्या कारवाईपूर्वी पसार; वरोरा पोलिसांत गुन्हा दाखल

खापरी-टाकळी परिसरात अवैध दारूविक्रीवर कारवाई; २४ पव्वे जप्त

दोन्ही संशयित आरोपी पोलिसांच्या कारवाईपूर्वी पसार; वरोरा पोलिसांत गुन्हा दाखल

वरोरा, दि. 13 सप्टेंबर २०२६ : डोंगरगाव रेल्वे परिसरातील महिलांनी अवैधरित्या विक्री होत असलेली देशी दारू पकडून पोलीस पाटील दर्शना कामटकर यांच्या घरी आणली. याबाबत माहिती मिळताच वरोरा पोलिसांनी घटनास्थळी जाऊन रॉकेट संत्रा देशी दारूच्या ९० एमएलच्या एकूण २४ पव्व्या, किंमत ८८० रुपये जप्त केल्या.

पोलिसांनी दिलेल्या माहितीनुसार, 10 सप्टेंबर ला सदर दारू मोतीराम  कुळसंगे ( रा. खापरी, ता. वरोरा) आणि विठ्ठल म मेश्राम ( रा. टाकळी) यांची असल्याचे महिलांनी सांगितले. मोतीराम कुळसंगे यांच्या घराजवळून १२ नग तर विठ्ठल मेश्राम यांच्या शेतातून १२ नग दारूच्या पव्व्या आणल्याचे पोलिसांच्या पंचनाम्यात नमूद आहे.

दारू विक्री करताना दोन्ही आरोपी पोलिसांच्या हाती लागण्यापूर्वी पळून गेल्याचे महिलांनी पोलिसांना सांगितले. पंचासमक्ष जप्तीची कारवाई करून त्यातील एक पव्वा रासायनिक विश्लेषणासाठी नमुना म्हणून वेगळा काढून सीलबंद करण्यात आला.

या प्रकरणी सहायक पोलीस निरीक्षक गणेश काशिनाथ मोरे यांच्या फिर्यादीवरून वरोरा पोलीस ठाण्यात महाराष्ट्र दारूबंदी कायदा कलम ६५ (ई) अन्वये गुन्हा दाखल करण्यात आला आहे. पुढील तपास वरोरा पोलीस करीत आहेत.