जळका येथे जुगार अड्ड्यावर वरोरा पोलिसांची धाड; तिघांवर गुन्हा दाखल

 जळका येथे जुगार अड्ड्यावर वरोरा पोलिसांची धाड; तिघांवर गुन्हा दाखल

वरोरा | दि. ९ सप्टेंबर २०२६ : जळका येथील हनुमान मंदिराजवळ खुल्या जागेत ५२ ताशपत्त्यांवर पैसे लावून जुगार खेळणाऱ्या तिघांवर वरोरा पोलिसांनी कारवाई केली. या कारवाईत रोख रक्कम व ताशपत्ते असा मुद्देमाल जप्त करण्यात आला आहे.

वरोरा पोलीस ठाण्याचे पोलीस हवालदार नंदकिशोर खनके व पोलीस अंमलदार रोशन तामसेटवार यांच्या पथकाने दि. ७ सप्टेंबर २०२६ रोजी पोलीस दूरक्षेत्र माढेळी परिसरात दारूबंदी व जुगारविरोधी कारवाईच्या अनुषंगाने पेट्रोलिंग सुरू केली होती. यावेळी मिळालेल्या गोपनीय माहितीच्या आधारे पोलिसांनी जळका येथील हनुमान मंदिराजवळ छापा टाकला.

छाप्यादरम्यान ५२ ताशपत्त्यांवर पैसे लावून जुगार खेळताना तीन जण आढळून आले. त्यांच्या ताब्यातील जुगाराच्या डावावरून ७०० रुपये रोख व ताशपत्ते जप्त करण्यात आले. त्यानंतर पंचांसमक्ष आरोपींची अंगझडती घेतली असता आरोपी योगेश हरीभाऊ ईटनकर याच्याकडून १,२६० रुपये, रविंद्र बाळकृष्ण मेश्राम याच्याकडून १०० रुपये, तर हरीप्रकाश मोतीलाल बसावत याच्याकडून ४०० रुपये, अशी एकूण २,४६० रुपये रोख रक्कम मिळून आली.

या प्रकरणी योगेश हरीभाऊ ईटनकर (वय ३९), रविंद्र बाळकृष्ण मेश्राम (वय ४०) आणि हरीप्रकाश मोतीलाल बसावत (वय ४९), तिघेही रा. जळका, ता. वरोरा, जि. चंद्रपूर, यांच्याविरुद्ध महाराष्ट्र जुगार प्रतिबंधक कायदा कलम १२(अ) अन्वये गुन्हा दाखल करण्यात आला आहे.

पोलिसांनी दि. ७ सप्टेंबर रोजी रात्री ९.५० ते १०.३० वाजेपर्यंत घटनास्थळी जप्ती पंचनामा केला. या कारवाईमुळे जळका परिसरातील अवैध जुगार खेळणाऱ्यांमध्ये खळबळ उडाली आहे.

...........