साखरा-वडगाव परिसरातील विवाहितेच्या आत्महत्या प्रकरणात शेगाव येथील डॉक्टरला अटक .

साखरा-वडगाव परिसरातील विवाहितेच्या आत्महत्या प्रकरणात शेगाव येथील डॉक्टरला अटक

गर्भपाताच्या गोळ्या दिल्याचा आरोप; उच्च न्यायालयाने जामीन अर्ज फेटाळल्यानंतर पोलिसांची कारवाई

शेगाव (बु.) : साखरा-वडगाव परिसरातील विवाहित महिलेच्या आत्महत्या प्रकरणात पोलिसांनी अखेर एका डॉक्टरला अटक केली आहे. डॉ. विष्णू विश्वास असे अटक करण्यात आलेल्या डॉक्टरचे नाव असून, मुंबई उच्च न्यायालयाच्या नागपूर खंडपीठाने जामीन अर्ज फेटाळल्यानंतर रविवारी पोलिसांनी ही कारवाई केली.

शेगाव (बु.) पोलिस ठाण्याच्या हद्दीतील साखरा-वडगाव परिसरातील मयुरी हरिदास सुपारे या विवाहित महिलेने दि. २ ऑगस्ट रोजी आत्महत्या केली होती. आत्महत्येपूर्वी लिहून ठेवलेल्या चिठ्ठीत तिने शेगाव (बु.) येथील एका डॉक्टरांच्या दवाखान्यात गर्भपात झाल्याचा उल्लेख केल्याचा दावा नातेवाईकांनी केला होता. या आरोपांच्या अनुषंगाने शेगाव पोलिसांनी प्रकरणाचा सखोल तपास सुरू केला होता.

या प्रकरणात यापूर्वी महिलेच्या पतीलाही अटक करण्यात आली होती. तपासादरम्यान महसूल विभाग, पोलिस विभाग, आरोग्य विभाग तसेच अन्न व औषध प्रशासनाच्या संयुक्त पथकाने शेगाव (बु.) येथील डॉ. विष्णू विश्वास यांच्या दवाखान्यावर धाड टाकली होती.

या कारवाईदरम्यान विविध प्रकारची औषधे, इंजेक्शने, सलाईन, शस्त्रक्रियेसाठी वापरण्यात येणारी उपकरणे तसेच काही प्रतिबंधित स्वरूपाच्या औषधांचा साठा जप्त करण्यात आल्याची माहिती तपास यंत्रणेकडून देण्यात आली होती. बऱ्याच वर्षापासून शेगाव येथे डॉक्टर असल्याची प्रॅक्टिस सुरू होती.

दरम्यान, तपासाच्या अनुषंगाने संबंधित डॉक्टरांचा शोध सुरू असताना ते फरार झाले होते. त्यानंतर डॉ. विष्णू विश्वास यांनी मुंबई उच्च न्यायालयाच्या नागपूर खंडपीठात अटकपूर्व जामिनासाठी अर्ज केला होता. मात्र न्यायालयाने त्यांचा जामीन अर्ज फेटाळून लावल्याने अखेर रविवारी पोलिसांनी त्यांना अटक केली.

डॉक्टरला न्यायालयासमोर हजर करण्यात आले असून न्यायालयाने त्याला तीन दिवसांची पोलीस कोठडी (PCR) सुनावली असून पुढील तपास शेगाव पोलीस करीत आहेत.