माढेळी सबस्टेशन ते दिडोंरा बॅरेजदरम्यान 33 केव्ही वायरची चोरी; 2 लाखांचा मुद्देमाल लंपास

माढेळी सबस्टेशन ते दिडोंरा बॅरेजदरम्यान 33 केव्ही वायरची चोरी; 2 लाखांचा मुद्देमाल लंपास

वरोरा, दि. 11 सप्टेंबर 2026 : माढेळी एमएसईडीसीएल सबस्टेशन ते दिडोंरा बॅरेज (पंप हाउस) दरम्यान पोलवर टाकण्यात आलेला सुमारे 2 लाख रुपये किमतीचा 33 केव्ही अल्युमिनियम वायर अज्ञात चोरट्यांनी कापून लंपास केल्याची घटना उघडकीस आली आहे.

पंप हाउससाठी विद्युत लाईन टाकण्याचे काम मागील दोन महिन्यांपासून सुरू आहे. या कामांतर्गत पोल उभारून AAA 100 SQ MM कंडक्टर टाकण्यात आला होता. शनिवार, 5 सप्टेंबर 2026 रोजी सायंकाळपर्यंत वायर व्यवस्थित असल्याचे आढळून आले होते. मात्र, रविवार 6 सप्टेंबर रोजी सकाळी साडेआठ वाजताच्या सुमारास पाहणी केली असता सोईट चौक ते नाला या परिसरातील 11 पोलवरील वायर कापून नेल्याचे निदर्शनास आले.

चोरीस गेलेल्या वायरची लांबी सुमारे 2 हजार मीटर असून त्याची अंदाजे किंमत 2 लाख रुपये असल्याचे तक्रारीत नमूद करण्यात आले आहे. सदर कामाचे कंत्राट अधिरा इंटरप्रायजेस, नागपूर यांना देण्यात आले असून श्री. राजू नायर आणि महेश पटेल यांच्या टीमकडून काम सुरू आहे.

याप्रकरणी पदमा राजू नायर यांनी वरोरा पोलीस ठाण्यात लेखी तक्रार दिली. त्यांच्या तक्रारीवरून पोलिसांनी अज्ञात आरोपीविरुद्ध भारतीय न्याय संहिता कलम 303(2) अन्वये गुन्हा नोंद करून तपास सुरू केला आहे. चोरीस गेलेला वायर व आरोपींचा शोध घेण्यात येत आहे.

.............