वरोऱ्यात अवैध देशी दारू विक्रीवर पोलिसांची कारवाई; १४५ बाटल्या जप्त.

वरोऱ्यात अवैध देशी दारू विक्रीवर पोलिसांची कारवाई; १४५ बाटल्या जप्त

वरोरा | दि. २१ ऑगस्ट २०२६

कलम : महाराष्ट्र दारूबंदी कायदा कलम ६५(ई)

वरोरा पोलीस ठाण्याच्या हद्दीत अवैध देशी दारू विक्री होत असल्याची माहिती मिळताच पोलिसांनी गुरुवार, दि. २० ऑगस्ट २०२६ रोजी कारवाई केली. या कारवाईत एका व्यक्तीस ताब्यात घेऊन त्याच्याकडून १४५ नग देशी दारूच्या बाटल्या जप्त करण्यात आल्या.

पोलीस निरीक्षकांच्या मार्गदर्शनाखाली पोलीस निरीक्षक सोनटक्के, पोलीस हवालदार क्र. २५७१ संदीप मुळे, पोलीस अंमलदार क्र. ०१ विशाल राजुरकर व पोलीस पथक गस्त घालत असताना कॉलरी वॉर्ड परिसरातील एका घरात देशी दारूचा साठा करून त्याची विक्री केली जात असल्याची माहिती मिळाली.

मिळालेल्या माहितीनुसार पंचांना सोबत घेऊन संबंधित ठिकाणी तपासणी करण्यात आली. यावेळी घरासमोर एक व्यक्ती अवैधरित्या देशी दारू विक्री करताना आढळून आला. त्याने आपले नाव दारासिंह संगतसिंह दुधानी (वय ३१, व्यवसाय मजुरी, रा. कॉलरी वॉर्ड, वरोरा) असे सांगितले.

तपासणीदरम्यान त्याच्याकडून ९० मि.ली. क्षमतेच्या १४५ प्लास्टिकच्या बाटल्या, ‘संत्रा’ लेबल असलेली रॉकेट देशी दारू, असा मुद्देमाल आढळून आला. या दारूची एकूण किंमत अंदाजे ५ हजार ८०० रुपये असल्याचे नमूद करण्यात आले आहे.

पोलिसांनी मुद्देमालापैकी एक बाटली स्वतंत्रपणे काढून त्यावर पोलीस व पंचांच्या स्वाक्षरीचे कागदी लेबल लावून मोहरबंद केली. उर्वरित मुद्देमाल पंचांसमक्ष ताब्यात घेण्यात आला. घटनास्थळाचा पंचनामा दि. २० ऑगस्ट २०२६ रोजी करण्यात आला.

या प्रकरणी आरोपीविरुद्ध महाराष्ट्र दारूबंदी कायदा कलम ६५(ई) अन्वये गुन्हा दाखल करण्यात आला असून, पुढील तपास वरोरा पोलीस ठाण्याच्या वतीने सुरू आहे.