वरोऱ्यात जुगार अड्ड्यावर पोलिसांची धाड; एकास अटक, मुद्देमाल जप्त

वरोऱ्यात जुगार अड्ड्यावर पोलिसांची धाड; एकास अटक, मुद्देमाल जप्त

वरोरा | दि. २८ जुलै २०२६

वरोरा पोलिसांनी शहरातील गांधी चौक येथील अनाज बाजार परिसरात सुरू असलेल्या अवैध जुगार अड्ड्यावर धाड टाकून एका आरोपीला अटक केली. या कारवाईत रोख रक्कम, कॅल्क्युलेटर, पेन व जुगारासाठी वापरण्यात येणाऱ्या आकड्यांच्या चिठ्ठ्या असा एकूण ₹१,००० किमतीचा मुद्देमाल जप्त करण्यात आला. ही कारवाई गुप्त माहितीच्या आधारे करण्यात आली. 

या प्रकरणी नामदेव तुकाराम पराते  याच्याविरुद्ध महाराष्ट्र जुगार प्रतिबंधक अधिनियम, १८८७ चे कलम १२(अ) अन्वये गुन्हा दाखल करण्यात आला आहे. 

पोलिसांनी दिलेल्या माहितीनुसार, गांधी चौक अनाज बाजार परिसरातील प्लास्टिक साहित्य विक्रीच्या दुकानात बोगस आकड्यांवर पैसे स्वीकारून जुगार खेळविला जात असल्याची गोपनीय माहिती मिळाली होती. त्यानुसार पोलिसांनी पंचांसमक्ष धाड टाकली. पोलिसांची चाहूल लागताच काही जण घटनास्थळावरून पळून गेले. मात्र आरोपी नामदेव पराते याच्याकडून दोन आकड्यांच्या चिठ्ठ्या, ₹८१० रोख रक्कम, एक पेन व एक जुना कॅल्क्युलेटर असा मुद्देमाल जप्त करण्यात आला.

या प्रकरणी फिर्याद पोलीस कर्मचारी रुपेश गोविंदराव निरसकर यांनी दिली असून वरोरा पोलीस ठाण्यात गुन्हा क्रमांक ०८४७/२०२६ नोंदविण्यात आला आहे. पुढील तपास पोलीस करत आहेत.