बालाजी मंदिरातील दानपेटी फोडून अडीच हजारांची रोकड लंपास

बालाजी मंदिरातील दानपेटी फोडून अडीच हजारांची रोकड लंपास

वरोरा | दि. ९ ऑगस्ट २०२६

वरोरा शहरातील बालाजी मंदिरात अज्ञात व्यक्तीने दानपेटीवरील कापडाला चीर मारून त्यातील अंदाजे २ हजार ते २ हजार ५०० रुपयांची रोकड चोरून नेल्याची घटना उघडकीस आली आहे. याप्रकरणी वरोरा पोलीस ठाण्यात अज्ञात आरोपीविरुद्ध गुन्हा दाखल करण्यात आला आहे. 

फिर्यादी विनोद दिवाकरराव नौकरकर (वय ४७, रा. नागरी, ता. वरोरा) यांनी दिलेल्या तक्रारीनुसार, त्यांचे वडील दिवाकरराव अभिमानजी नौकरकर हे बालाजी मंदिर ट्रस्टचे अध्यक्ष आहेत. प्रकृती ठीक नसल्याने ते सध्या घरी राहत असून, मंदिराचे कामकाज विनोद नौकरकर पाहतात. 

दि. ४ ऑगस्ट २०२६ रोजी दुपारी ३.३० ते ३.४५ वाजताच्या सुमारास विनोद नौकरकर हे बालाजी मंदिरात पूजा करण्यासाठी गेले असता त्यांना मंदिरातील देवासमोर ठेवलेल्या दानपेटीवरील कापडाला चीर मारल्याचे दिसून आले. त्यानंतर त्यांनी सुनील विठ्ठलराव घोलकर यांना बोलावून सीसीटीव्ही फुटेज तपासले. त्यामध्ये एका अज्ञात इसमाने दानपेटीवरील कापड कापून त्यातील पैसे काढल्याचे दिसून आले. 

या प्रकरणी भारतीय न्याय संहिता (BNS) कलम 305 व 331(3) अन्वये वरोरा पोलीस ठाण्यात गुन्हा नोंद करण्यात आला आहे. एफआयआर दि. ७ ऑगस्ट २०२६ रोजी दुपारी १.५१ वाजता दाखल करण्यात आला असून पोलीस उपनिरीक्षक गणेश काशीनाथ मोरे, वरोरा पोलीस ठाणे. तपास करीत आहे.