रेल्वे कामगारांकडून शेतकऱ्यावर लोखंडी रॉडने हल्ला; वरोरा पोलिसांत गुन्हा दाखल.

रेल्वे कामगारांकडून शेतकऱ्यावर लोखंडी रॉडने हल्ला; वरोरा पोलिसांत गुन्हा दाखल

वरोरा | दि. ३ ऑगस्ट २०२६

वरोरा तालुक्यातील डोंगरगाव रेल्वे येथे रेल्वेचे काम करणाऱ्या काही मजुरांनी एका शेतकऱ्यावर लोखंडी रॉडने हल्ला करून जखमी केल्याची घटना घडली असून, या प्रकरणी वरोरा पोलीस ठाण्यात अज्ञात ३ ते ४ महिला व पुरुष मजुरांविरुद्ध गुन्हा दाखल करण्यात आला आहे.

पोलीसांनी दिलेल्या माहितीनुसार, तक्रारदार योगेश मंगल दरेकर (रा. डोंगरगाव रेल्वे, ता. वरोरा) यांनी दिलेल्या फिर्यादीवरून हा गुन्हा नोंदविण्यात आला आहे.

फिर्यादीनुसार, १ ऑगस्ट रोजी सायंकाळी रेल्वेचे काम करणारे काही मजूर वीजेच्या तारांवर आकडा टाकत असल्याचे दिसल्याने दरेकर यांनी त्यांना याबाबत जाब विचारला होता. त्यानंतर मजुरांनी त्यांना धमकी दिल्याचा आरोप आहे. दुसऱ्या दिवशी, २ ऑगस्ट रोजी सायंकाळी सुमारे ७ वाजण्याच्या सुमारास शेतातून घरी जात असताना त्याच मजुरांनी त्यांना शिवीगाळ करून मारहाण केली. यावेळी एका मजुराने लोखंडी रॉडने डोक्यावर वार केल्याने ते जखमी झाले. घटनेनंतर आरोपी तेथून पसार झाले. जखमींवर शासकीय रुग्णालयात उपचार करण्यात आले.

या प्रकरणी वरोरा पोलिसांनी भारतीय न्याय संहिता (BNS) २०२३ अंतर्गत कलम ११८(१), ११५(२), ३५१(२), ३५२ व ३(५) अन्वये गुन्हा दाखल केला आहे. पुढील तपास पोलीस करीत आहेत.