वरोड्यात मोफत आरोग्य शिबिराला उत्स्फूर्त प्रतिसाद; १०१ रुग्णांची तपासणी

लता मंगेशकर हॉस्पिटलच्या तज्ज्ञ डॉक्टरांचे मार्गदर्शन; न्यूरोलॉजी व नेफ्रोलॉजी विभागाचा सहभाग

वरोरा, दि. २८ ऑगस्ट २०२६ :/ ठेंगडीसर
एन. के. पी. साळवे वैद्यकीय महाविद्यालय व संशोधन केंद्रांतर्गत नागपूर येथील लता मंगेशकर हॉस्पिटलच्या वतीने वरोडा शहरात मोफत सुपर स्पेशालिटी आरोग्य शिबिराचे आयोजन करण्यात आले. २७ ऑगस्ट रोजी येथील अस्थिरोग तज्ज्ञ डॉ. सागर वझे यांच्या सुयोग हॉस्पिटलमध्ये सकाळी १० ते दुपारी २ वाजेपर्यंत हे शिबिर घेण्यात आले.

या शिबिरात न्यूरोलॉजी आणि नेफ्रोलॉजी विभागातील तज्ज्ञ डॉक्टरांनी रुग्णांची तपासणी करून आवश्यक वैद्यकीय मार्गदर्शन केले. या शिबिरात न्यूरोलॉजी विभागातील ८०, तर नेफ्रोलॉजी विभागातील २१, अशा एकूण १०१ रुग्णांची तपासणी करण्यात आली.

न्यूरोलॉजी विभागात पाठदुखी, मानदुखी, डोकेदुखी, कानात आवाज येणे, हात-पायात मुंग्या येणे, पक्षाघात, हात-पायात कमजोरी येणे, ब्रेन ट्यूमर, स्पायनल ट्यूमर तसेच मानेचा व कंबरेचा स्पॉन्डिलायसिस आदी तक्रारींबाबत रुग्णांना मार्गदर्शन करण्यात आले.

नेफ्रोलॉजी विभागात मूत्रपिंडाशी संबंधित आजार, पाय, घोटे, चेहरा किंवा डोळ्यांच्या आसपास सूज येणे, लघवीमध्ये रक्त येणे, कंबर किंवा किडनीच्या भागात दुखणे, रक्तदाब वाढणे, सतत थकवा व अशक्तपणा जाणवणे, भूक कमी लागणे, मळमळ किंवा उलटी होणे आदी लक्षणांची तपासणी करण्यात आली.

या शिबिरासाठी लता मंगेशकर हॉस्पिटलचे न्यूरोलॉजी तज्ज्ञ डॉ. स्वप्नेश चिंधालोरे तसेच नेफ्रोलॉजी विभागाचे तज्ज्ञ डॉ. मोहित कुरुंदवाडकर यांचे सहकार्य लाभले.

ग्रामीण व शहरी भागातील नागरिकांना दर्जेदार तज्ज्ञ वैद्यकीय सेवा उपलब्ध करून देणे तसेच गंभीर आजारांची लक्षणे वेळेत ओळखून योग्य उपचाराचा मार्ग मिळावा, हा या शिबिरामागील उद्देश होता.

शिबिराला मिळालेला प्रतिसाद लक्षात घेता गरीब व गरजू नागरिकांपर्यंत उत्तम आरोग्य सुविधा पोहोचविण्यासाठी यापुढेही दरमहा अशाच प्रकारच्या आरोग्य शिबिरांचे आयोजन करण्याचा मानस आयोजकांनी व्यक्त केला.