पापा जाधव यांच्या अंत्यसंस्कारापूर्वी राजुरा शहरात तणाव* राजुरा पोलीस ठाण्यावर नागरिकांचा आक्रोश - शिवाजी चौकात किरकोळ लाठीमार* पोलीस बंदोबस्तात अखेर अंत्यसंस्कार

* पापा जाधव यांच्या अंत्यसंस्कारापूर्वी राजुरा शहरात तणाव

* राजुरा पोलीस ठाण्यावर नागरिकांचा आक्रोश - शिवाजी चौकात किरकोळ लाठीमार

* पोलीस बंदोबस्तात अखेर अंत्यसंस्कार

राजुरा, ता.प्र. - 26/8/20/26

            दिनांक २४ ऑगस्ट रोजी राजुरा न्यायालयाच्या समोर दुचाकीवरून आलेल्या दोन हल्लेखोरांनी केलेल्या गोळीबारात राजुरा येथील विनोद उर्फ पापा जाधव, वय ३५  राहणार सोमनाथपूर याचा मृत्यू झाला होता. या प्रकरणी आज दिनांक २५ रोजी सोमनाथपूर येथील नागरिक, महिला व नातेवाईक यांनी राजुरा पोलीस ठाणे येथे धुडघूस घातला. यानंतर राजुरा विश्रामगृह समोरील शासकीय विश्राम गृह समोरील चौकात येऊन येथील महिला व नागरिकांनी रास्ता रोको करण्याचा प्रयत्न केला. यावेळी राजुरा पोलिसांनी कौशल्याने परिस्थिती हाताळत किरकोळ लाठीमार करून परिस्थिती नियंत्रणात आणली. यानंतर चंद्रपूर येथून आलेल्या दंगा नियंत्रण पथकासह प्रेत सोमनाथपूर येथील पापा जाधव यांचे घरी नेण्यात आले. दरम्यान आज चार आरोपींना सात दिवसांची पोलिस कोठडी न्यायालयाने सुनावली आहे. 

          घटना घडताच या प्रकरणातील हल्लेखोर  करण मेकलवार, वय २२ व करण बावीस्कर, वय २४ काल दिनांक २५ रोजी रात्री राजुरा पोलिस ठाण्यात आत्मसमर्पण केले. यावेळी घटनेच्या वेळी वापरलेली पिस्तूल आरोपींनी राजुरा पोलिस ठाण्यात जमा केली. आज दिनांक २५ ऑगस्ट रोजी पहाटे कार्तिक उमेश खामनकर, वय २२ व परवेज सरवर शेख, वय २३ दोघेही राहणार राजुरा या दोघांना ताब्यात घेण्यात आले. या चार आरोपींवर भारतीय न्याय संहिता १०३(१), ३(५), सहकलम ३ (२५), २७ भारतीय शस्त्र कायदा यानुसार राजुरा पोलीस ठाण्यात गुन्हा दाखल करण्यात आला आहे. आज सचिन लवंडे या संशयित तरूणाला ताब्यात घेण्यात आले आहे. आणखी काही आरोपी असल्याची शक्यता असून राजुरा पोलिस अधिक तपास करीत आहेत. आज अतिरिक्त पोलिस अधिक्षक ईश्वर कातकडे यांनी राजुरा येथे भेट दिली. ठाणेदार नितीन चिंचोळकर अधिक तपास करीत आहे. 

            राजुरा शहरात यापूर्वी तीन खून झाले आणि सर्व आरोपी बाहेर आहेत. याबाबत पोलिस निष्क्रिय असल्याचा आरोप महिलांनी केला. सायंकाळी ५ वाजताच्या दरम्यान पोलिस बंदोबस्तात पापा जाधव याचेवर राजुरा येथे अंत्यसंस्कार करण्यात आले. यावेळी मृतकाचे नांदेड, चंद्रपूर तसेच तेलंगणातून मोठ्या संख्येने आलेले नातेवाईक उपस्थित होते. सध्या राजुरा येथे तणावपूर्ण शांतता दिसून येत असून राजुरा पोलिस परिस्थितीवर लक्ष ठेवून आहेत.

...................