वरोरा नगरपालिकेकडून ६०-७० वर्षांपासून राहणाऱ्या अतिक्रमित नागरिकांना कायम पट्ट्यांचे वाटप; नागरिकांमध्ये आनंदाचे वातावरण.

वरोरा नगरपालिकेकडून ६०-७० वर्षांपासून राहणाऱ्या अतिक्रमित नागरिकांना कायम पट्ट्यांचे वाटप; नागरिकांमध्ये आनंदाचे वातावरण

​वरोरा (प्रतिनिधी): चेतन लूतडे 

वरोरा नगरपालिका क्षेत्रातील कालोरी वार्ड, कर्मवीर वार्ड, आझाद वार्ड, राजीव गांधी वार्ड, मालवीय वार्ड आणि हनुमान वार्ड या भागांत गेल्या ६० ते ७० वर्षांपासून अतिक्रमण करून राहणाऱ्या नागरिकांना अखेर मालकी हक्काचे पट्टे वाटप करण्यात आले आहेत. या निर्णयामुळे अनेक वर्षांपासून आपल्या हक्काच्या जागेच्या प्रतीक्षेत असलेल्या शेकडो गरीब कुटुंबांना मोठा दिलासा मिळाला असून परिसरात आनंदाचे वातावरण आहे.

​गेल्या अनेक दशकांपासून आमदार, खासदार, नगरसेवक आणि नगराध्यक्ष यांच्या निवडणुकांमध्ये नागरिकांना पट्टे देण्याचे आश्वासन दिले जात होते. मात्र, प्रत्यक्षात कार्यवाही होत नव्हती. अतिक्रमाचा ठप्पा असल्यामुळे या रहिवाशांना पंतप्रधान आवास योजना, रमाई आवास योजना किंवा शबरी आवास योजना यांसारख्या शासकीय योजनांचा आणि घरकुलाचा लाभ मिळत नव्हता. तसेच कर पावती असूनही इतर मूलभूत सोयी-सुविधांपासून त्यांना वंचित राहावे लागत होते.

​शासनाच्या धोरणानुसार आणि चंद्रपूर जिल्ह्याचे खासदार, प्रतिभाताई धानोरकर स्थानिक आमदार करण देवतळे तसेच नगराध्यक्ष अर्चना ठाकरे यांच्या  विशेष पुढाकाराने २०११ पूर्वीच्या अतिक्रमितधारकांना पट्टे वाटप करण्याचे धोरण राबवण्यात आले. त्यानुसार नगरपालिकेच्या वतीने आयोजित कार्यक्रमात पात्र लाभार्थ्यांना पट्ट्यांचे वाटप करण्यात आले.

 "हा दिवस या सर्व गरीब व अतिक्रमितधारकांसाठी अत्यंत आनंदाचा आणि महत्त्वाचा ठरला असून उर्वरित पात्र नागरिकांची कागदपत्रे लवकरात लवकर तयार करून शहरातील  अतिक्रमितधारकांना कायम पट्टे दिले जातील असे मत नगराध्यक्ष अर्चना ठाकरे यांनी व्यक्त केला.

नगरपालिकेने आयोजित केलेल्या   पट्टेवाटप कार्यक्रमात  प्रमुख पाहुणे खासदार प्रतिभाताई धानोरकर ,कार्यक्रमाचे अध्यक्ष करण देवतळे, नगराध्यक्ष अर्चनाताई ठाकरे, मुख्याधिकारी सिद्धार्थ मेश्राम, उपविभागीय अधिकारी , तहसीलदार, तसेच नगरसेवक , पट्टे धारक  उपस्थित होते.

........

​