वरोऱ्यात अवैध दारूविक्रीवर पोलिसांची कारवाई; 61,800 रुपयांचा मुद्देमाल जप्त.

वरोऱ्यात अवैध दारूविक्रीवर पोलिसांची कारवाई; 61,800 रुपयांचा मुद्देमाल जप्त.

वरोरा, दि. 22 ऑगस्ट 2026 : वरोरा पोलिसांनी अवैध दारूविक्रीविरोधात कारवाई करत दोन जणांकडून देशी दारूच्या 45 सीलबंद बाटल्या आणि विनाक्रमांकाची मोपेड स्कूटी असा एकूण 61 हजार 800 रुपयांचा मुद्देमाल जप्त केला. ही कारवाई 21 ऑगस्ट रोजी सायंकाळी मौजा बारव्हा येथील राणी दुर्गावती स्मारक परिसरात करण्यात आली.

पोलिसांनी दिलेल्या माहितीनुसार, मंगेश डोमाजी मेश्राम (वय 42) आणि दिवाकर सुरेश मडावी (वय 40), दोघे रा. बारव्हा, ता. वरोरा, जि. चंद्रपूर, हे विनाक्रमांकाच्या मोपेड स्कूटीने अवैधरीत्या दारू विक्री करण्याच्या उद्देशाने दारू घेऊन येत असल्याची माहिती पोलिसांना मिळाली.

माहितीच्या आधारे पोलिसांनी राणी दुर्गावती स्मारकाजवळील परिसरात नाकाबंदी केली. यावेळी दोघे संशयित मोपेडवर बसलेले आढळून आले. पंचांसमक्ष झडती घेतली असता त्यांच्या जवळील पांढऱ्या रंगाच्या प्लास्टिक पिशवीत 90 मिली क्षमतेच्या देशी दारूच्या 45 सीलबंद बाटल्या आढळून आल्या. या दारूची किंमत 1,800 रुपये, तर विनाक्रमांकाच्या मोपेडची किंमत 60 हजार रुपये असल्याचे पोलिसांनी नमूद केले आहे.

दारू बाळगण्याबाबत आवश्यक परवाना मागितला असता संबंधितांकडे कोणताही परवाना नसल्याचे समोर आले. त्यानंतर पोलिसांनी दारू व मोपेड असा एकूण 61,800 रुपयांचा मुद्देमाल जप्त केला.

या प्रकरणी वरोरा पोलीस ठाण्यात महाराष्ट्र दारूबंदी अधिनियम, 1949 मधील कलम 65(अ) व 83 अन्वये गुन्हा दाखल करण्यात आला आहे. प्रकरणाचा पुढील तपास सहाय्यक पोलीस निरीक्षक संजय भाऊराव गौरकर करीत आहेत. तक्रार पोलीस हवालदार विक्की सदाशिवराव करपे (ब. नं. 732) यांनी दिली.