वरोऱ्यात रेती चोरीचा प्रयत्न उधळला; नंबर नसलेला ट्रॅक्टर व MH-34 , A-4321 ट्रॉलीसह ₹5.07 लाखांचा मुद्देमाल जप्त

वरोऱ्यात रेती चोरीचा प्रयत्न उधळला; नंबर नसलेला ट्रॅक्टर व MH-34 , A-4321 ट्रॉलीसह ₹5.07 लाखांचा मुद्देमाल जप्त

वरोरा, दि. 16 जुलै :
वरोरा शहरातील संस्कार भारती पब्लिक स्कूलजवळ सुरू असलेल्या रस्ता व नाली बांधकामाच्या ठिकाणी अज्ञात तिघांनी रेती चोरी करण्याचा प्रयत्न केल्याची घटना 16 जुलै रोजी मध्यरात्री घडली.

 फिर्यादी व त्यांच्या चालकाने घटनास्थळी धाव घेतल्याने आरोपी नंबर नसलेला मेसी फर्गुसन कंपनीचा ट्रॅक्टर व MH-34 A-4321 क्रमांकाची ट्रॉली घटनास्थळीच सोडून पसार झाले. पोलिसांनी ट्रॅक्टर, ट्रॉली आणि एक ब्रास रेती असा सुमारे ₹5.07 लाखांचा मुद्देमाल जप्त केला आहे.

फिर्यादी संजय कवडूजी जुनघरे (वय 53, रा. संताजी नगर, वरोरा) यांनी दिलेल्या तक्रारीनुसार, बांधकामासाठी आणलेली रेती वारंवार चोरीला जात असल्याने त्यांनी चालकासह घटनास्थळी पाळत ठेवली होती. 16 जुलै रोजी रात्री सुमारे 12.30 वाजता लाल रंगाचा ट्रॅक्टर व तिघेजण रेती भरत असताना ते घटनास्थळी पोहोचले. त्यांना पाहताच आरोपी ट्रॅक्टर व ट्रॉली जागीच सोडून पळून गेले. त्यानंतर डायल 112 वर माहिती देण्यात आली.

या प्रकरणी वरोरा पोलीस ठाण्यात भारतीय न्याय संहिता (BNS) 2023 चे कलम 303(2), 62 आणि 3(5) अन्वये अज्ञात आरोपींविरुद्ध गुन्हा दाखल करण्यात आला असून पुढील तपास सुरू आहे.