चहा टपरी हॉटेल मधून २५ हजारांची रोकड लंपास; वरोरा पोलिसांत चोरीचा गुन्हा दाखल.

चहा टपरी हॉटेल मधून २५ हजारांची रोकड लंपास; वरोरा पोलिसांत चोरीचा गुन्हा दाखल

वरोरा : शहरातील जाजू चौक परिसरातील एका चहाच्या टपरीतून अज्ञात चोरट्याने २५ हजार रुपयांची रोकड चोरून नेल्याची घटना उघडकीस आली आहे. या प्रकरणी वरोरा पोलीस ठाण्यात अज्ञात आरोपीविरुद्ध भारतीय न्याय संहिता (BNS) कलम 305(अ) व 331(4) अन्वये गुन्हा दाखल करण्यात आला आहे.

फिर्यादी रमेश दत्तात्रय देवळे (रा. मोकासे ले-आऊट, वरोरा) हे जाजू चौकात चहाची टपरी चालवतात. १९ जुलै रोजी रात्री हॉटेल बंद करण्याची जबाबदारी त्यांनी पुतण्या पवन देवळे याच्याकडे सोपवून घरी गेले. दुसऱ्या दिवशी सकाळी दुकान उघडण्यासाठी गेल्यानंतर मागील दरवाजा उघडा असल्याचे त्यांच्या निदर्शनास आले. दुकानातील लोखंडी पेटीत ठेवलेली बँकेच्या आरडी खात्यातून काढलेली २५ हजार रुपयांची रोकड अज्ञात चोरट्याने चोरून नेल्याचे आढळले.

घटनेची माहिती मिळताच वरोरा पोलिसांनी अज्ञात आरोपीविरुद्ध चोरीचा गुन्हा नोंदवून तपास सुरू केला आहे. या प्रकरणाचा पुढील तपास पोलीस उपनिरीक्षक शरद भस्मे करीत आहेत.