श्री मोठे विठ्ठल मंदिर देवस्थान, वरोरा येथे आषाढी एकादशी निमित्त भव्य नामसप्ताह सोहळ्याचे आयोजन

श्री मोठे विठ्ठल मंदिर देवस्थान, वरोरा येथे आषाढी एकादशी निमित्त भव्य नामसप्ताह सोहळ्याचे आयोजन

वरोरा : श्री मोठे विठ्ठल मंदिर देवस्थान, वरोरा यांच्या वतीने आषाढी एकादशी निमित्त शनिवार, दि. 18 जुलै 2026 ते रविवार, दि. 26 जुलै 2026 या कालावधीत भव्य नामसप्ताह सोहळ्याचे आयोजन करण्यात आले आहे. भक्तिमय वातावरणात होणाऱ्या या सोहळ्यात विविध धार्मिक, आध्यात्मिक, सांस्कृतिक व सामाजिक उपक्रमांचे आयोजन करण्यात आले असून भाविकांनी मोठ्या संख्येने उपस्थित राहून लाभ घ्यावा, असे आवाहन देवस्थानतर्फे करण्यात आले आहे.

सोहळ्याची सुरुवात शनिवार, दि. 18 जुलै रोजी पहाटे 5.00 वाजता घटस्थापना व सकाळी 7.00 वाजता ध्वजारोहणाने होणार आहे. त्यानंतर 18 ते 25 जुलै दरम्यान दररोज सकाळी 6.00 वाजता श्रींची महापूजा तसेच सकाळी 9.30 व संध्याकाळी 6.30 वाजता भजन व महाआरती आयोजित करण्यात आली आहे.

या सप्ताहात भव्य कीर्तन सोहळा आयोजित करण्यात आला असून विविध नामवंत कीर्तनकारांचे कीर्तन होणार आहे. तसेच श्री गणेश अथर्वशीर्ष सामूहिक पठण, पालखी हरिपाठ, भक्ती संगीत कार्यक्रम यांचेही आयोजन करण्यात आले आहे.

सामाजिक बांधिलकी जपत बुधवार, दि. 22 जुलै 2026 रोजी सकाळी 10.00 ते दुपारी 2.00 या वेळेत मोफत नेत्र तपासणी व दंत तपासणी शिबिर आयोजित करण्यात आले आहे. या शिबिरात डॉ. निखिल अ. लांबट (नेत्ररोग तज्ज्ञ) व डॉ. स्नेहदीप रामटेके (दंतचिकित्सक) सेवा देणार आहेत.

रविवार, दि. 26 जुलै 2026 रोजी आषाढी द्वादशी निमित्त गोपाळकाल्याचे कीर्तन, श्रींच्या प्राणप्रिय रथ व माऊली-जगद्गुरूंची पालखी भजनी दिंडीसह भव्य शोभायात्रा आयोजित करण्यात आली आहे.

याशिवाय शुक्रवार, दि. 31 जुलै 2026 रोजी दुपारी 2.00 ते 5.00 या वेळेत महाप्रसादाचे आयोजन करण्यात आले असून सर्व भाविकांनी उपस्थित राहून महाप्रसादाचा लाभ घ्यावा, असे आवाहन श्री मोठे विठ्ठल मंदिर देवस्थान, वरोरा यांच्या वतीने करण्यात आले आहे.

“सोहळा जमला आषाढी वारीचा, सण आला पंढरीचा; मेळा जमला भक्तगणांचा, ध्यास विठू माऊलीच्या दर्शनाचा!” अशी भक्तिमय हाक देत या संपूर्ण सोहळ्यात भाविकांनी उत्स्फूर्त सहभाग नोंदवावा, असे देवस्थानने आवाहन केले आहे. 

....