कोल इंडियाचा जागतिक विक्रम; एका दिवसात १४ लाख वृक्षलागवड, वेकोली माजरी क्षेत्राने २५ हजार रोपे लावून दिले मोठे योगदान.

कोल इंडियाचा जागतिक विक्रम; एका दिवसात १४ लाख वृक्षलागवड, वेकोली माजरी क्षेत्राने २५ हजार रोपे लावून दिले मोठे योगदान.

वरोरा | प्रतिनिधी

'एक पेड माँ के नाम' या पर्यावरण संवर्धनाच्या संकल्पनेला बळ देत कोल इंडिया लिमिटेडने मंगळवार, दि. २१ जुलै २०२६ रोजी एका दिवसात तब्बल १४ लाख वृक्षांची लागवड करून जागतिक विक्रमाच्या दिशेने ऐतिहासिक पाऊल उचलले. 

देशभरातील कोल इंडियाच्या विविध अनुषंगिक कंपन्यांनी या महाअभियानात सहभाग घेतला.

या अभियानांतर्गत वेस्टर्न कोलफिल्ड्स लिमिटेड (वेकोली) यांना २ लाख वृक्षलागवडीचे उद्दिष्ट देण्यात आले होते. त्यापैकी माजरी क्षेत्राला २५ हजार वृक्षलागवडीचे लक्ष्य देण्यात आले होते. क्षेत्रीय महाव्यवस्थापकांच्या मार्गदर्शनाखाली वेकोली माजरी क्षेत्राच्या पर्यावरण विभागाने महाराष्ट्र व मध्य प्रदेश राज्याच्या वन विभागाच्या संयुक्त सहकार्याने हे उद्दिष्ट एका दिवसात पूर्ण केले.

माजरी क्षेत्रातील विविध खुल्या व भूमिगत कोळसा खाणींच्या परिसरात नियोजनबद्ध पद्धतीने वृक्षलागवड करण्यात आली. या उपक्रमात परिसरातील ग्रामपंचायतींचे सरपंच, ग्रामस्थ, शालेय विद्यार्थी, महाराष्ट्र व मध्य प्रदेश वन विभागाचे वरिष्ठ अधिकारी, वेकोलीचे अधिकारी, कर्मचारी तसेच विविध सामाजिक संस्थांच्या प्रतिनिधींनी उत्स्फूर्त सहभाग नोंदविला. प्रत्येकाने स्वतः वृक्षारोपण करून पर्यावरण संरक्षणाची सामूहिक जबाबदारी स्वीकारली.

या उपक्रमामुळे पर्यावरण संवर्धन, जैवविविधतेचे संरक्षण, हरित क्षेत्रात वाढ, हवेतील कार्बन डायऑक्साइडचे प्रमाण कमी करणे तसेच भावी पिढ्यांसाठी स्वच्छ व निरोगी पर्यावरण निर्माण करण्यास मोठी मदत होणार आहे. कोळसा उत्पादनासोबत पर्यावरण संरक्षणालाही तितकेच महत्त्व देण्याची वेकोलीची भूमिका या उपक्रमातून अधोरेखित झाली.

कोल इंडिया लिमिटेडच्या या विक्रमी वृक्षारोपण मोहिमेची गिनीज बुक ऑफ वर्ल्ड रेकॉर्डमध्ये नोंद होण्याची प्रक्रिया सुरू असून, हा उपक्रम देशातील सर्वात मोठ्या सामूहिक वृक्षलागवड अभियानांपैकी एक मानला जात आहे. पर्यावरण संरक्षणासाठी उद्योग, शासन आणि नागरिक यांच्या संयुक्त सहभागाचे हे प्रेरणादायी उदाहरण ठरत आहे.