वरोरा बसस्थानकाजवळ गांजाचे सेवन करताना युवक पोलिसांच्या ताब्यात

वरोरा बसस्थानकाजवळ गांजाचे सेवन करताना युवक पोलिसांच्या ताब्यात

वरोरा, दि. 21 जुलै : वरोरा शहरातील बसस्थानकाजवळील पुलाखाली गांजाचे सेवन करत असलेल्या एका 23 वर्षीय युवकाविरुद्ध वरोरा पोलिसांनी अंमली पदार्थ प्रतिबंधक कायद्यान्वये गुन्हा दाखल केला आहे.

स्थानिक गुन्हे शाखा, चंद्रपूर येथील पथकाला मिळालेल्या गुप्त माहितीच्या आधारे 20 जुलै रोजी सायंकाळी बसस्थानक परिसरात सापळा रचण्यात आला. पंचांसमक्ष कारवाई करत असताना मृणाल दिलीप पडवे (वय 23, रा. सुभाष वॉर्ड, गणेशनगर, वरोरा) हा चिलममधून गांजाचे सेवन करताना आढळून आला.

पोलिसांनी आरोपीची झडती घेतली असता त्याच्याकडून गांजा सेवनासाठी वापरण्यात आलेली चिनीमातीची चिलम, जळालेल्या अवशेषांसह कपडा व इतर साहित्य जप्त करण्यात आले. त्यानंतर आरोपीची वैद्यकीय तपासणी करून रक्ताचे नमुनेही घेण्यात आले.

या प्रकरणी वरोरा पोलीस ठाण्यात गुंगीकारक औषधी द्रव्ये व मनोव्यापारावर परिणाम करणारे पदार्थ अधिनियम, 1985 च्या कलम 27 अंतर्गत गुन्हा क्रमांक 0821/2026 दाखल करण्यात आला असून पुढील तपास पोलीस हवालदार अमोल मारोती नवघरे करीत आहेत.