*मुसळधार पावसाने वरोरा जलमय; सखल भागात पूरस्थिती, नागरिकांचे जनजीवन विस्कळीत*

*मुसळधार पावसाने वरोरा जलमय; सखल भागात पूरस्थिती, नागरिकांचे जनजीवन विस्कळीत*

वरोरा, दि. ३० जुलै : वरोरा शहरात गुरुवारी दिवसभर झालेल्या मुसळधार पावसामुळे जनजीवन पूर्णपणे विस्कळीत झाले. शहरातील अनेक सखल भागांमध्ये मोठ्या प्रमाणात पाणी साचल्याने पूरस्थिती निर्माण झाली असून अनेक नागरिकांच्या घरात पाणी शिरल्याने शहरवासियांना मोठ्या अडचणींचा सामना करावा लागत आहे.

     वरोरा शहरात मुसळधार पाणी बरसत असल्याने टिळक वार्ड , कर्मवीर वार्ड, माढळी चौक आदी परिसरांमध्ये नाले तुडुंब भरुन रस्त्यांवर पाणी साचले आहे.  संततधार पावसामुळे अनेक ठिकाणी रस्ते जलमय झाले. लोकांच्या घरात पाणी शिरले. मोठ्या प्रमाणात रस्त्यावर पाणी साचल्याने वाहतुकीवर परिणाम होऊन नागरिकांची ये-जा देखील विस्कळीत झाली.

न.प.च्या नियोजन शुन्य कारभारामुळे अनेक नागरिकांच्या घरांमध्ये पाणी शिरले असून घरातील जीवनावश्यक वस्तूंचे नुकसान झाल्याची माहिती मिळत आहे. साचलेल्या पाण्यामुळे नागरिकांमध्ये भीतीचे वातावरण निर्माण झाले असून तातडीने पाणी उपसा व निचऱ्याची व्यवस्था करण्याची मागणी होत आहे.

दरम्यान, चंद्रपूर जिल्ह्यात पुढील २४ तासांत अतिमुसळधार पावसाची शक्यता असल्याचा इशारा प्रशासनाने दिला आहे. त्यामुळे नागरिकांनी अत्यावश्यक कामाशिवाय घराबाहेर पडू नये, तसेच सखल भाग, नाले व पूरग्रस्त परिसरांपासून सुरक्षित अंतर राखण्याचे आवाहन करण्यात आले आहे.