अंत्यविधीसाठी बाहेरगावी गेलेल्या प्राचार्यांच्या घरावर डल्ला; ९६ हजारांचे सोन्याचे दागिने लंपास

अंत्यविधीसाठी बाहेरगावी गेलेल्या प्राचार्यांच्या घरावर डल्ला; ९६ हजारांचे सोन्याचे दागिने लंपास

वरोरा :
वरोरा शहरातील भवानी लेआउट परिसरात अज्ञात चोरट्यांनी बंद घर फोडून सुमारे ९६ हजार रुपये किमतीचे सोन्याचे दागिने चोरून नेल्याची घटना उघडकीस आली आहे. या प्रकरणी वरोरा पोलीस ठाण्यात गुन्हा दाखल करण्यात आला असून पोलीस आरोपींचा शोध घेत आहेत.

तक्रारदार मनोहर रामचंद्र चौधरी (वय ६०) हे राजे धर्मराव कला व वाणिज्य महाविद्यालय, मुलचेरा येथे प्राचार्य म्हणून कार्यरत आहेत. त्यांच्या वडिलांचे निधन झाल्याने ते कुटुंबासह २३ जुलै रोजी अंत्यविधीसाठी चिमूर येथे गेले होते. २५ जुलै रोजी घरी परतल्यानंतर मुख्य दरवाज्याचे कुलूप तुटलेले तसेच घरातील कपाटे उघडलेली असल्याचे त्यांच्या निदर्शनास आले.

चोरट्यांनी घरातील १५ ग्रॅम सोन्याची साखळी, ६ ग्रॅमची अंगठी, ८ ग्रॅमचे मंगळसूत्र, कानातील टॉप्स, सोन्याचे मणी व जीवती असा एकूण ९६ हजार रुपयांचा ऐवज लंपास केला.

या प्रकरणी वरोरा पोलीस ठाण्यात भारतीय न्याय संहिता (BNS) कलम ३०५, ३३१(३) व ३३१(४) अंतर्गत गुन्हा दाखल करण्यात आला असून पुढील तपास पोलीस उपनिरीक्षक अशोक महादेव ढोके करीत आहेत.