जगन्नाथ बाबा मंदिराची दानपेटी फोडून रोख रक्कम लंपाससीसीटीव्हीत तिघे संशयित कैद; वरोरा पोलिसांत गुन्हा दाखल.

जगन्नाथ बाबा मंदिराची दानपेटी फोडून रोख रक्कम लंपास

सीसीटीव्हीत तिघे संशयित कैद; वरोरा पोलिसांत गुन्हा दाखल

वरोरा - चेतन लूतडे 

वरोरा : शहरातील शिवाजी वॉर्ड परिसरातील जगन्नाथ बाबा मंदिरात अज्ञात चोरट्यांनी दानपेटी फोडून त्यातील अंदाजे ३ ते ४ हजार रुपयांची रोकड चोरून नेल्याची घटना उघडकीस आली आहे. या प्रकरणी वरोरा पोलीस ठाण्यात अज्ञात तीन आरोपींविरुद्ध गुन्हा दाखल करण्यात आला आहे.

तक्रारदार मेघनाथ वासुदेव कुरेकार (वय ६३) यांनी दिलेल्या फिर्यादीनुसार, २० जुलै रोजी सकाळी मंदिरात पूजा करून दानपेटी सुरक्षित अवस्थेत ठेवण्यात आली होती. मात्र सायंकाळी शेजाऱ्यांकडून फोनद्वारे माहिती मिळाल्यानंतर त्यांनी मंदिरात जाऊन पाहणी केली असता दानपेटीचे कुलूप फोडून त्यातील रक्कम चोरीला गेल्याचे निदर्शनास आले.

मंदिरातील सीसीटीव्ही फुटेजमध्ये तीन संशयित युवक दानपेटी फोडून पैसे काढताना दिसून आले आहेत. या आधारावर पोलिसांनी अज्ञात आरोपींविरुद्ध भारतीय न्याय संहितेतील संबंधित कलमान्वये गुन्हा नोंदवून पुढील तपास सुरू केला आहे. तपास पोलीस उपनिरीक्षक अजिंक्य अनिल पवार करीत आहेत.