पावना येथे अवैध देशी दारू विक्रीवर वरोरा पोलिसांची धाड; आरोपी अटकेत

 पावना येथे अवैध देशी दारू विक्रीवर वरोरा पोलिसांची धाड; आरोपी अटकेत

वरोरा | दि. 19 जुलै 2026

वरोरा पोलीस स्टेशनच्या हद्दीतील पावना गावात अवैध देशी दारूची विक्री करणाऱ्या एका इसमावर वरोरा पोलिसांनी कारवाई करत त्याच्याकडून देशी दारूचा साठा जप्त केला. या प्रकरणी आरोपीविरुद्ध महाराष्ट्र दारूबंदी अधिनियम, 1949 चे कलम 65(ई) अंतर्गत गुन्हा दाखल करण्यात आला आहे.

पोलिसांना मिळालेल्या गोपनीय माहितीच्या आधारे 17 जुलै रोजी सायंकाळी पावना येथे छापा टाकण्यात आला. कारवाईदरम्यान निर्दोष पुरुषोत्तम ढोक (वय 25, रा. पावना, ता. वरोरा) हा अवैधरित्या देशी दारू विक्री करताना आढळून आला. त्याच्याकडून 24 नग (90 मि.ली.) 'रॉकेट संत्रा' देशी दारूच्या बाटल्या जप्त करण्यात आल्या असून त्यांची एकूण किंमत ₹960 असल्याचे पोलिसांनी सांगितले.

सदर कारवाई पोलीस हवालदार संदीप विठ्ठल मुळे व त्यांच्या पथकाने पंचांसमक्ष केली. जप्त मुद्देमाल ताब्यात घेऊन आरोपीविरुद्ध गुन्हा नोंद करण्यात आला असून पुढील तपास पोलीस हवालदार नरेश कावडुजी नन्नावरे करीत आहेत.