वरोऱ्यात घरासमोरून २० हजारांची दुचाकी चोरी; अज्ञात चोराविरुद्ध गुन्हा दाखल

वरोऱ्यात घरासमोरून २० हजारांची दुचाकी चोरी; अज्ञात चोराविरुद्ध गुन्हा दाखल

वरोरा : शहरातील टिळक वॉर्ड परिसरातून घरासमोर उभी असलेली दुचाकी अज्ञात चोरट्याने लंपास केल्याची घटना उघडकीस आली आहे. याप्रकरणी वरोरा पोलीस ठाण्यात अज्ञात आरोपीविरुद्ध गुन्हा दाखल करण्यात आला असून पोलीस पुढील तपास करीत आहेत.

फिर्यादी जितेंद्र रामभाऊ आसेकर (वय ३२), रा. श्रीकृपा नगर, गजानन मंदिराजवळ, टिळक वॉर्ड, वरोरा यांचे ऑटोमोबाईलचे दुकान आहे. त्यांच्या मामाच्या नावावर असलेली हिरो होंडा पॅशन प्रो (क्रमांक MH-34-AR-8392) ही ग्रे रंगाची दुचाकी घरगुती वापरासाठी होती.

१२ जुलै २०२६ रोजी रात्री सुमारे ९ वाजता त्यांनी दुकान बंद करून दुचाकी घराच्या अंगणात उभी केली. मात्र, १३ जुलै रोजी सकाळी ६ वाजता पाहणी केली असता दुचाकी जागेवर नव्हती. परिसरात शोध घेतला असता ती मिळून न आल्याने अखेर वरोरा पोलीस ठाण्यात तक्रार दाखल करण्यात आली.

चोरीस गेलेली दुचाकी जुनी वापरातील असून तिची अंदाजे किंमत २० हजार रुपये असल्याचे फिर्यादीने नमूद केले आहे.

याप्रकरणी वरोरा पोलिसांनी भारतीय न्याय संहिता (BNS) २०२३ च्या कलम ३०३(२) (वाहन चोरी) अन्वये अज्ञात आरोपीविरुद्ध गुन्हा दाखल केला आहे. प्रकरणाचा पुढील तपास पोलीस उपनिरीक्षक अजिंक्य अनिल पवार करीत आहेत.