भरधाव कारची गाईंच्या कळपाला जोरदार धडक; एक गाय ठार, तीन गंभीर जखमी – संतप्त ग्रामस्थांनी वाहन अडवून भरपाईची मागणीमांगली बसस्टॉपजवळ नागपूर महामार्गावरील घटना; चालक फरार, दारूचा साठा व अनेक नंबर प्लेट आढळल्याचा ग्रामस्थांचा दावा

भरधाव कारची गाईंच्या कळपाला जोरदार धडक; एक गाय ठार, तीन गंभीर जखमी – संतप्त ग्रामस्थांनी वाहन अडवून भरपाईची मागणी

मांगली बसस्टॉपजवळ नागपूर महामार्गावरील घटना; चालक फरार, दारूचा साठा व अनेक नंबर प्लेट आढळल्याचा ग्रामस्थांचा दावा

वरोरा | प्रतिनिधी

नागपूर–वरोरा राष्ट्रीय महामार्गावरील मांगली बसस्टॉपजवळ मंगळवारी (८ जुलै) सायंकाळी सुमारे ६ वाजताच्या सुमारास भरधाव वेगाने येणाऱ्या एमएच-०४ एचएन-४२२२ क्रमांकाच्या मारुती कंपनीच्या कारने गाईंच्या कळपाला जोरदार धडक दिल्याने एक गाय जागीच मृत्युमुखी पडली, तर तीन गाई गंभीर जखमी झाल्या. या घटनेमुळे परिसरात मोठी खळबळ उडाली.

मिळालेल्या माहितीनुसार, संबंधित कार नागपूरहून वरोऱ्याकडे येत होती. गाईंचा कळप रस्ता ओलांडत असताना भरधाव वेगातील कारने त्यांना जोरदार धडक दिली. अपघातानंतर वाहनाचे मोठे नुकसान झाले असून चालक घटनास्थळावरून फरार झाला.

घटनेनंतर मांगली येथील ग्रामस्थ मोठ्या संख्येने घटनास्थळी जमा झाले. मृत गाईची तसेच जखमी जनावरांची नुकसानभरपाई मिळावी, या मागणीसाठी ग्रामस्थांनी अपघातग्रस्त वाहन अडवून धरले. वाहनातील चालक अथवा मालक घटनास्थळी न आल्याने ग्रामस्थांमध्ये तीव्र संताप व्यक्त करण्यात आला.

ग्रामस्थांच्या म्हणण्यानुसार, अपघातग्रस्त कारमध्ये देशी दारूचा साठा होता. तसेच वाहनात तीन ते चार वेगवेगळ्या नंबर प्लेटही आढळल्याचा दावा त्यांनी केला आहे. त्यामुळे या मालाची टिपी आहे की नाही हे कळाले नाही.  या प्रकारामुळे वाहनाबाबत संशय निर्माण झाला असून, या सर्व बाबींची सखोल चौकशी करण्याची मागणी होत आहे. मात्र, या दाव्यांची अधिकृत पुष्टी अद्याप झालेली नाही.

घटनेची माहिती मिळताच वरोरा पोलीस स्टेशनला कळविण्यात आले. त्यानंतर पोलीस घटनास्थळी दाखल झाले. अपघातग्रस्त वाहन ताब्यात घेण्यासाठी वरोऱ्यातून टोईंग व्हॅनही बोलाविण्यात आली असून वाहन पोलीस स्टेशनमध्ये नेण्याची प्रक्रिया सुरू होती.

या प्रकरणी पुढील तपास वरोरा पोलीस करीत असून, फरार चालकाचा शोध घेतला जात आहे. तसेच वाहनातील साहित्य, कागदपत्रे आणि ग्रामस्थांनी केलेल्या दाव्यांचीही पडताळणी केली जाणार असल्याची माहिती मिळाली आहे.

........