तुराणा घाटावर पोहण्यासाठी गेलेल्या तरुणाचा नदीत बुडून बेपत्ता; शोधमोहीम सुरू

तुराणा घाटावर पोहण्यासाठी गेलेल्या तरुणाचा नदीत बुडून बेपत्ता; शोधमोहीम सुरू

वरोरा : रविवारची सुट्टी असल्याने वर्धा नदीवरील तुराणा घाट येथे पोहण्यासाठी गेलेल्या तीन मित्रांपैकी एका तरुणाचा खोल पाण्यात बुडून बेपत्ता झाल्याची दुर्दैवी घटना घडली. बेपत्ता झालेल्या तरुणाचे नाव क्षितिज चौधरी असून तो चंद्रपूर येथील रहिवासी आहे असे सांगण्यात आले.

मिळालेल्या माहितीनुसार, क्षितिज चौधरी आणि त्याचे दोन मित्र हिरो आणि अरुण पोहण्यासाठी गेले होते. क्षितिज व त्याचे मित्र वरोरा येथील जीएमआर कंपनीमध्ये कार्यरत आहेत. रविवारची सुट्टी असल्याने तिघेही वर्धा नदीवरील तुराणा घाट परिसरात दुपारी पोहण्यासाठी गेले होते.

नदीच्या एका काठावरून दुसऱ्या काठावर जाण्यासाठी मध्यभागी वाळूच्या पोत्यांचा तात्पुरता मार्ग तयार करण्यात आला आहे. या मार्गावरून पुढे गेल्यानंतर तिघेही नदीत पोहण्यासाठी उतरले. पोहत असताना ते खोल पाण्यात गेल्याने क्षितिज चौधरी याचा अंदाज सुटला आणि तो पाण्यात बुडून बेपत्ता झाला. 

घटनेनंतर त्याच्या दोन मित्रांनी तत्काळ जीएमआर कंपनीला तसेच संबंधित यंत्रणेला माहिती दिली. यानंतर पोलिसांना कळविण्यात आले असून पोलीस आणि बचाव पथकाने घटनास्थळी धाव घेत शोधमोहीम सुरू केली.

वृत्त लिहीपर्यंत क्षितिज चौधरी याचा शोध लागलेला नव्हता. पोलीस आणि बचाव पथकाकडून नदीत कसून शोधमोहीम सुरू असून पुढील तपास सुरू आहे.