वरोरात स्थानिक गुन्हे शाखा चंद्रपूरच्या पथकाची कारवाई; देशी दारू सह ३८ हजारांची मुद्देमाल जप्त, एकावर गुन्हा दाखल.

वरोरात स्थानिक गुन्हे शाखा चंद्रपूरच्या पथकाची कारवाई; देशी दारू सह ३८ हजारांची मुद्देमाल जप्त, एकावर गुन्हा दाखल.

वरोरा : स्थानिक गुन्हे शाखा, चंद्रपूरच्या पथकाने वरोरा शहरात धाडसी कारवाई करत अवैधरित्या देशी दारूची वाहतूक करणाऱ्या एका आरोपीला ताब्यात घेतले. या कारवाईत ८ हजार रुपयांची देशी दारू व ३० हजार रुपये किमतीची दुचाकी असा एकूण ३८ हजार रुपयांचा मुद्देमाल जप्त करण्यात आला. या प्रकरणी वरोरा पोलीस ठाण्यात महाराष्ट्र दारूबंदी अधिनियम १९४९ च्या कलम ६५(अ) अन्वये गुन्हा दाखल करण्यात आला आहे.

पोलीसांनी दिलेल्या माहितीनुसार, १० जुलै रोजी रात्री स्थानिक गुन्हे शाखेचे पोलीस निरीक्षक अमोल काचोरे यांच्या मार्गदर्शनाखाली पोलीस उपनिरीक्षक सर्वेश बेलसरे यांच्या नेतृत्वाखाली पथक वरोरा परिसरात पेट्रोलिंग व अवैध धंद्यांवर कारवाई करत होते. त्यावेळी मिळालेल्या गोपनीय माहितीच्या आधारे गाणफाडे ले-आऊट रेल्वे पटरीजवळ सापळा रचण्यात आला.

या कारवाईदरम्यान आरोपी खुशाब चक्रपाणी दिवसे (वय ३६, रा. इंदिरा नगर, बोर्डा, ता. वरोरा) याला ताब्यात घेण्यात आले. त्याच्या ताब्यातील होंडा अॅक्टिव्हा (MH-34-AZ-7630) या दुचाकीची तपासणी केली असता ९० मिलीच्या देशी दारूच्या २०० बाटल्या आढळून आल्या. दारू वाहतुकीचा कोणताही वैध परवाना नसल्याचे निष्पन्न झाल्याने देशी दारू व दुचाकी असा एकूण ३८ हजार रुपयांचा मुद्देमाल जप्त करण्यात आला. ही देशी दारू विनापरवानगी कोणत्या दुकानातून विकत घेतली आहे याचा तपास  पोलीस करीत आहेत.