शालेय विद्यार्थ्यांच्या सुरक्षेसाठी वरोरा पोलिसांची कडक भूमिका; नियमांचे उल्लंघन करणाऱ्या ऑटोचालकांवर होणार कारवाई

शालेय विद्यार्थ्यांच्या सुरक्षेसाठी वरोरा पोलिसांची कडक भूमिका; नियमांचे उल्लंघन करणाऱ्या ऑटोचालकांवर होणार कारवाई

वरोरा | प्रतिनिधी

शालेय विद्यार्थ्यांच्या सुरक्षिततेच्या दृष्टीने वरोरा पोलीस ठाण्याचे पोलीस निरीक्षक ओमप्रकाश सोनटक्के यांनी शहरातील सर्व ऑटोचालक संघटना व शालेय विद्यार्थ्यांची वाहतूक करणाऱ्या ऑटोचालकांची तातडीची बैठक घेऊन महत्त्वाच्या सुरक्षा सूचना दिल्या.

बैठकीत त्यांनी स्पष्ट केले की, एका ऑटोमध्ये सहा विद्यार्थ्यांपेक्षा अधिक विद्यार्थ्यांची वाहतूक करू नये. तसेच ऑटोच्या समोरील सीटवर कोणत्याही विद्यार्थ्याला बसवू नये, असे सक्त निर्देश देण्यात आले.

याशिवाय, ऑटोच्या वर लावण्यात येणारा स्टँड सुरक्षित पद्धतीने तयार करावा व त्याच्या बाजूला कोणत्याही विद्यार्थ्याचे दप्तर लटकणार नाही, याची विशेष काळजी घ्यावी. विद्यार्थ्यांच्या सुरक्षेसाठी ऑटोच्या दोन्ही बाजूंच्या दरवाजांवर संरक्षक जाळी बसविणेही बंधनकारक असल्याचे सांगण्यात आले.

पोलीस निरीक्षक ओमप्रकाश सोनटक्के यांनी इशारा देताना सांगितले की, ऑटोचालक व पिकप व्हान याना मद्यप्राशन करून वाहन चालविताना आढळल्यास संबंधित चालकाचा वाहन परवाना रद्द करण्याची कारवाई करण्यात येईल.

तसेच, या सर्व सुरक्षा नियमांचे पालन न करणाऱ्या ऑटोचालकांवर येत्या काही दिवसांत विशेष तपासणी मोहीम राबवून कायदेशीर कारवाई करण्यात येईल, असा स्पष्ट इशारा वरोरा पोलिसांकडून देण्यात आला आहे.

विद्यार्थ्यांची सुरक्षित वाहतूक ही सर्वांची सामूहिक जबाबदारी असून, सर्व ऑटोचालकांनी नियमांचे काटेकोर पालन करून प्रशासनाला सहकार्य करावे, असे आवाहनही यावेळी करण्यात आले.