भद्रावतीत सुगंधित तंबाखूच्या अवैध कारखान्यावर पोलिसांची धाड₹१३,९०५ चा मुद्देमाल जप्त; एकाला अटक, मुख्य पुरवठादार फरार.

भद्रावतीत सुगंधित तंबाखूच्या अवैध कारखान्यावर पोलिसांची धाड

₹१३,९०५ चा मुद्देमाल जप्त; एकाला अटक, मुख्य पुरवठादार फरार.

भद्रावती | प्रतिनिधी | दि. 8 जुलै

भद्रावती पोलिसांनी गुप्त माहितीच्या आधारे शास्त्रीनगर परिसरात धाड टाकून सुगंधित तंबाखू व मावा तयार करण्याच्या अवैध व्यवसायावर कारवाई दिनांक पाच जुलैला करण्यात आली. या कारवाईत ₹१३,९०५ किमतीचा सुगंधित तंबाखू, सुपारी, चुना व तयार मावा जप्त करण्यात आला असून एकाला अटक करण्यात आली आहे. या प्रकरणातील मुख्य पुरवठादार अद्याप फरार असून त्याचा पोलीस शोध घेत आहेत.

पोलीस उपनिरीक्षक संतोष केदार यांना मिळालेल्या खात्रीशीर माहितीच्या आधारे पोलीस निरीक्षकांच्या मार्गदर्शनाखाली शास्त्रीनगर येथे छापा टाकण्यात आला. पंचांसमक्ष करण्यात आलेल्या कारवाईदरम्यान प्रशिक हिरामन चहांदे (वय ३०, रा. शास्त्रीनगर, भद्रावती) हा आपल्या घरात सुपारी व सुगंधित तंबाखू मिसळून मावा तयार करताना आढळून आला. घराची झडती घेतली असता मोठ्या प्रमाणात सुगंधित तंबाखूचा साठा आणि मावा तयार करण्यासाठी वापरले जाणारे साहित्य जप्त करण्यात आले.

जप्त मुद्देमाल

३५ सीलबंद "मजा १०८" सुगंधित तंबाखूचे डबे – किंमत ₹९,९७५

अंदाजे १ किलो कातरलेली सुपारी – किंमत ₹५३०

१ किलो चुना – किंमत ₹५००

तयार माव्याच्या ७० पुड्या – किंमत ₹२,८००

मावा तयार करण्यासाठी वापरलेले दोन रबरी तुकडे – किंमत ₹१००

एकूण जप्त मुद्देमाल : ₹१३,९०५.

चौकशीदरम्यान आरोपी प्रशिक चहांदे याने हा सुगंधित तंबाखू व सुपारीचा माल वैभव लांडे (रा. बेघर वस्ती, सुमठाणा) याच्याकडून मिळाल्याची कबुली दिली. त्यानुसार पोलिसांनी वैभव लांडे याच्या शोधासाठी पथक पाठविले; मात्र तो घरात न आढळल्याने तो सध्या फरार असून त्याचा शोध सुरू आहे.

या प्रकरणी दोन्ही आरोपींविरुद्ध अन्न सुरक्षा व मानके अधिनियम, २००६ तसेच भारतीय न्याय संहिता (BNS), २०२३ मधील संबंधित कलमान्वये भद्रावती पोलीस ठाण्यात गुन्हा दाखल करण्यात आला आहे. पुढील तपास पोलीस निरीक्षकांच्या मार्गदर्शनाखाली सुरू आहे.