भरधाव ट्रॅक्टरच्या धडकेत कारचे ₹40 हजारांचे नुकसान; चालकाविरुद्ध गुन्हा दाखल.

भरधाव ट्रॅक्टरच्या धडकेत कारचे ₹40 हजारांचे नुकसान; चालकाविरुद्ध गुन्हा दाखल

वरोरा : तालुक्यातील चिकणी येथे भरधाव व निष्काळजीपणे ट्रॅक्टर चालवून कारला धडक देत अपघात करून घटनास्थळावरून पसार झालेल्या ट्रॅक्टर चालकाविरुद्ध वरोरा पोलिसांनी गुन्हा दाखल केला आहे.

तक्रारदार डॉ. हेमंत वासुदेवराव खापने (रा. आझाद वॉर्ड, वरोरा) यांनी दिलेल्या तक्रारीनुसार, शनिवारी (दि. २५ जुलै) सकाळी सुमारे १० वाजताच्या सुमारास ते त्यांच्या किया सेल्टॉस (MH-34 CJ-0606) या कारने चिकणी येथून वरोऱ्याकडे येत होते. त्यावेळी आरोपी रणजीत भास्कर भोयर (रा. चिकणी, ता. वरोरा) याने त्याच्या ताब्यातील ट्रॅक्टर (MH-34 CD-9048) व ट्रॉली (MH-34 CJ-4320) भरधाव व निष्काळजीपणे चालवून कारच्या मागील उजव्या बाजूस जोरदार धडक दिली. या अपघातात कारचे मागील दार व टेललाइटचे नुकसान होऊन सुमारे ₹४० हजारांचे नुकसान झाले. धडक दिल्यानंतर चालक घटनास्थळावर न थांबता पसार झाला, असे तक्रारीत नमूद आहे. 

या प्रकरणी वरोरा पोलिसांनी आरोपी रणजीत भास्कर भोयर याच्याविरुद्ध मोटार वाहन अधिनियम १९८८ चे कलम १८४, १३४ तसेच भारतीय न्याय संहिता (BNS) २०२३ चे कलम २८१ व ३२४(४) अन्वये गुन्हा दाखल केला असून पुढील तपास पोलीस उपनिरीक्षकांच्या मार्गदर्शनाखाली सुरू आहे.