बांधकामाच्या वादातून सिव्हिल इंजिनियरवर लोखंडी पावडा व रॅप्टरने हल्ला

बांधकामाच्या वादातून सिव्हिल इंजिनियरवर लोखंडी पावडा व रॅप्टरने हल्ला

वरोरा : घर बांधकामाच्या कामादरम्यान झालेल्या किरकोळ वादाचे रूपांतर मारहाणीमध्ये झाल्याची घटना वरोरा शहरातील व्होल्टाज कॉलनी परिसरात घडली. या प्रकरणी वरोरा पोलिसांनी दोन जणांविरुद्ध गुन्हा नोंदविला आहे.

पोलिसांनी दिलेल्या माहितीनुसार, अब्दुल मोनीश अब्दुल मतीन शेख (वय 32), रा. अपूर्वा नगर, आनंदवन चौक, वरोरा हे सिव्हिल इंजिनियर असून बांधकामाचे ठेके घेतात. त्यांनी प्रविण हरबडे यांच्या घराचे सुमारे 18 लाख 80 हजार रुपयांचे बांधकामाचे काम घेतले होते. शेजारीच रमेशकुमार श्रीराम सिंह यांचेही घराचे बांधकाम सुरू होते.

29 मे रोजी सकाळी अकराच्या सुमारास शेख हे बांधकाम साईटवर काम पाहत असताना दुपारी एक वाजताच्या सुमारास मजुरामार्फत त्यांना रमेशकुमार सिंह यांनी बोलावले. पिलर साठी खोदलेल्या खड्ड्यामुळे त्यांच्या घराशेजारची माती खचत असल्याचा आरोप सिंह यांनी केला. यावरून दोघांमध्ये शाब्दिक वाद झाला.

तक्रारीनुसार, काही वेळानंतर रमेशकुमार सिंह व त्यांचा साळा शिव मेहरा हे लोखंडी पावडा व रॅप्टर घेऊन आले. त्यांनी शिवीगाळ करत अब्दुल शेख यांच्यावर हल्ला केला. लोखंडी पावड्याने पाठीवर तर रॅप्टरने मान व पाठीवर मारून दुखापत केल्याचा आरोप तक्रारीत करण्यात आला आहे.

दरम्यान, झटापटीत रमेशकुमार सिंह यांचा तोल जाऊन ते पिलरच्या खड्ड्यात पडल्याचे तसेच रॅप्टर हिसकावताना तो शिव मेहरा यांच्या चेहऱ्याला लागल्याचेही तक्रारीत नमूद करण्यात आले आहे.

या प्रकरणाचा पुढील तपास वरोरा पोलीस करीत आहेत.