येथे संशयित एचटीबीटी कापूस बियाण्यांचा मोठा साठा जप्त२८.५२ लाखांचा मुद्देमाल जप्त; नागपूर व यवतमाळ येथील दोघांविरुद्ध गुन्हा दाखल

 येथे संशयित एचटीबीटी कापूस बियाण्यांचा मोठा साठा जप्त

२८.५२ लाखांचा मुद्देमाल जप्त; नागपूर व यवतमाळ येथील दोघांविरुद्ध गुन्हा दाखल

वरोरा : वरोरा-वणी बायपास रोडवरील कचरा डेपोजवळ कृषी विभागाच्या पथकाने कारवाई करत संशयित अनधिकृत एचटीबीटी (HTBT) कापूस बियाण्यांचा मोठा साठा जप्त केला. या प्रकरणी वरोरा पोलिसांनी दोन आरोपींविरुद्ध विविध कायद्यांअंतर्गत गुन्हा दाखल केला असून तब्बल २८ लाख ५२ हजार ५०० रुपयांचा मुद्देमाल जप्त करण्यात आला आहे.

या प्रकरणातील आरोपींमध्ये

ईस्माईल कदीर खान (वय अंदाजे ५५, रा. वैष्णवदेवी नगर, वाठोडा, नागपूर)

परमानंद प्रेमानंद डाखरे (वय अंदाजे ५०, रा. टाकळी, ता. मारेगाव, जि. यवतमाळ)

यांचा समावेश आहे.

याबाबतची फिर्याद गजानन पंढरी हटवार (वय ४८), कृषी अधिकारी तथा बियाणे निरीक्षक, पंचायत समिती वरोरा यांनी वरोरा पोलीस ठाण्यात दिली.

मिळालेल्या गुप्त माहितीनुसार कृषी विभागाच्या पथकाने सोमवार, दि. १८ मे २०२६ रोजी सायंकाळी सुमारे ५.०५ वाजता वरोरा-वणी बायपास रोडवर आंबेकर पेट्रोल पंपाजवळ संशयित वाहन अडविले. MH-49-AR-4962 क्रमांकाच्या फिकट पिवळ्या रंगाच्या सुपर कॅरी मारुती टर्बो वाहनाची तपासणी केली असता त्यामध्ये पिवळ्या रंगाच्या सीलबंद पिशव्यांमध्ये कापूस बियाण्यांचा साठा आढळून आला.

तपासणीदरम्यान वाहन चालक ईस्माईल खान याने कागदपत्रे सादर केली. मात्र संशय आल्याने एक बॅग उघडून पाहिली असता त्यामध्ये संशयित HTBT Hybrid Cotton Seed Variety H-1100 आढळून आले.

यानंतर कृषी विभागाचे अधिकारी, भरारी पथक तसेच पंचांच्या उपस्थितीत पंचनामा करण्यात आला. तपासणीमध्ये

H-1100 वाणाचे २५ बॅगमध्ये १२५० पाकिटे

हरियाली 111 (TG) वाणाचे २५ बॅगमध्ये १२५० पाकिटे

अशी एकूण २५०० पाकिटे संशयित कापूस बियाणे आढळून आली. प्रत्येक पाकिटाचे वजन ४५० ग्रॅम असून एकूण वजन सुमारे ११२५ किलो आहे. बियाण्यांची किंमत अंदाजे २२ लाख ५२ हजार ५०० रुपये असल्याचे सांगण्यात आले.

याशिवाय माल वाहतुकीसाठी वापरण्यात आलेले सुपर कॅरी वाहन अंदाजे ६ लाख रुपये किमतीचे असल्याने एकूण जप्त मुद्देमालाची किंमत २८ लाख ५२ हजार ५०० रुपये इतकी आहे.

दरम्यान, पंचनामा सुरू असताना परमानंद डाखरे घटनास्थळी पोहोचले व सदर माल स्वतःचा असल्याचे सांगितले.

कृषी विभागाने नमुना तपासणीसाठी दोन्ही वाणांचे प्रत्येकी ३ पाकिटे प्रयोगशाळेकडे पाठविले आहेत.

आरोपींवर खालील कलमान्वये गुन्हा दाखल

पर्यावरण संरक्षण अधिनियम १९८६ कलम ७, १५, १६

बियाणे अधिनियम १९६६ कलम ६(a), ६(b), ७(a), ७(c), ७(d), १९

बियाणे नियम १९६८ नियम ७ ते १५

अत्यावश्यक वस्तू अधिनियम १९५५ कलम ३ व ७

भारतीय न्याय संहिता (BNS) २०२३ कलम ३१८(४), ३(५)

या प्रकरणाचा पुढील तपास पोलीस उपनिरीक्षक मनीष जगन्नाथ तळेवार करीत आहेत.