वडगाव परिसरात अवैध देशी दारूसह एक जण पोलिसांच्या ताब्यात

वडगाव परिसरात अवैध देशी दारूसह एक जण पोलिसांच्या ताब्यात

वरोरा : वरोरा पोलिसांनी अवैध देशी दारू विक्रीविरोधात कारवाई करत वडगाव परिसरातून एका व्यक्तीस ताब्यात घेत मोठ्या प्रमाणात देशी दारू जप्त केली. ही कारवाई ७ मे २०२६ रोजी सायंकाळच्या सुमारास करण्यात आली.

पोलीसांनी दिलेल्या माहितीनुसार, पोहवा संदिप विठ्ठल मुळे, सपोनि शरद भस्मे व पोलीस कर्मचारी पेट्रोलिंग करत असताना मुखबिरामार्फत माहिती मिळाली की, वडगाव येथील राजदरबार हॉटेल परिसरात एक इसम अवैधरित्या देशी दारू विक्रीसाठी बाळगून आहे. मिळालेल्या माहितीच्या आधारे पंचांना सोबत घेऊन पोलिसांनी घटनास्थळी धाड टाकली.

यावेळी एक व्यक्ती हातात पिशवी घेऊन संशयित हालचाल करताना दिसून आला. पोलिसांनी त्याची चौकशी केली असता त्याने आपले नाव चंदन सुरजप्रकाश ओझा (वय ३६, रा. वागधरा, ता. वणी, जि. यवतमाळ) असे सांगितले. त्याच्या जवळील कापडी पिशवीची तपासणी केली असता त्यामध्ये रॉकेट संत्रा कंपनीच्या ९० एमएलच्या ३१ सिलबंद देशी दारूच्या बाटल्या आढळून आल्या. जप्त करण्यात आलेल्या दारूची अंदाजे किंमत १ हजार २४० रुपये असल्याचे पोलिसांनी सांगितले.

सदर व्यक्तीकडे दारू बाळगण्याचा कोणताही परवाना नसल्याचे निष्पन्न झाल्यानंतर पोलिसांनी पंचांसमक्ष मुद्देमाल जप्त केला. त्यातील एक बाटली रासायनिक विश्लेषणासाठी सील करून नमुना म्हणून ठेवण्यात आली आहे.

या प्रकरणी चंदन सुरजप्रकाश ओझा याच्याविरुद्ध महाराष्ट्र दारूबंदी कायद्याच्या कलम ६५ (ई) अन्वये गुन्हा नोंद करण्यात आला असून पुढील तपास वरोरा पोलीस करीत आहेत.