मार्डा येथे ट्रॅक्टरमध्ये लपून बसलेला संशयित युवक ताब्यात; चोरीच्या उद्देशाचा पोलिसांना संशय

मार्डा येथे ट्रॅक्टरमध्ये लपून बसलेला संशयित युवक ताब्यात; चोरीच्या उद्देशाचा पोलिसांना संशय

बातमी: चेतन लूतडे 6/5/26

वरोरा : तालुक्यातील मौजा मार्डा येथे मध्यरात्रीच्या सुमारास ट्रॅक्टरच्या ट्रॉलीमध्ये संशयास्पदरीत्या लपून बसलेल्या एका युवकाला पोलिसांनी ताब्यात घेतले. ही कारवाई ६ मे रोजी पहाटे १.४० वाजताच्या सुमारास रात्र गस्तीदरम्यान करण्यात आली.

पोलीस हवालदार संदीप विठ्ठल मुळे व पोलीस कर्मचारी विशाल राजुरकर हे वरोरा पोलीस स्टेशन हद्दीत पेट्रोलिंग करत असताना त्यांना मार्डा गावात उभ्या असलेल्या ट्रॅक्टर (क्र. एमएच 27 डीए 4721) च्या ट्रॉलीमध्ये एक इसम संशयास्पदरीत्या लपून बसलेला दिसून आला. पोलिसांनी त्याला ताब्यात घेऊन चौकशी केली असता त्याने आपले नाव सुमित कैलास सयाम (वय 20, रा. घोडाझरी ता. नागभीड, सध्या खातोडा ता. वरोरा) असे सांगितले.

मात्र, तो ट्रॅक्टरमध्ये का लपला होता याबाबत समाधानकारक उत्तर देऊ शकला नाही. त्याच्या हालचाली व वर्तन संशयास्पद असल्याने चोरीसारखा गुन्हा करण्याच्या उद्देशाने तो परिसरात फिरत असल्याचा पोलिसांना संशय आला. यानंतर पंचांच्या उपस्थितीत घटनास्थळी पंचनामा करण्यात आला.