ब्रह्मपुरीतील ख्रिस्तानंद हॉस्पिटलवर कारवाई; नोंदणी रद्द, ऑपरेशन थिएटर सील

ब्रह्मपुरीतील ख्रिस्तानंद हॉस्पिटलवर कारवाई; नोंदणी रद्द, ऑपरेशन थिएटर सील

बातमी: अंकूश अवथे 

चंद्रपूर : ब्रह्मपुरी शहरातील ख्रिस्तानंद हॉस्पिटलवर जिल्हा प्रशासनाने मोठी कारवाई करत रुग्णालयाची नोंदणी रद्द केली असून ऑपरेशन थिएटर सील करण्यात आले आहे. मोतीबिंदू शस्त्रक्रियेनंतर तीन रुग्णांना जंतूसंसर्ग होऊन त्यांची दृष्टी गेल्याची गंभीर तक्रार प्राप्त झाल्यानंतर ही कारवाई करण्यात आली.

मिळालेल्या माहितीनुसार, १९ फेब्रुवारी रोजी या रुग्णालयात तीन रुग्णांवर मोतीबिंदूची शस्त्रक्रिया करण्यात आली होती. त्यानंतर संबंधित रुग्णांची दृष्टी गेल्याची तक्रार अलीकडेच जिल्हा प्रशासनाकडे करण्यात आली. या पार्श्वभूमीवर चौकशी समिती नेमण्यात आली होती.

चौकशी समितीच्या प्राथमिक अहवालात धक्कादायक बाब समोर आली आहे. ख्रिस्तानंद हॉस्पिटलमध्ये स्वतंत्र नेत्ररोग विभागास मान्यता नसतानाही अवैधरित्या नेत्र शस्त्रक्रियागृह चालवून शस्त्रक्रिया केल्या जात असल्याचे निष्पन्न झाले. यासंदर्भात जिल्हा शल्य चिकित्सक डॉ. महादेव चिंचोळे यांनी माहिती दिली.

बॉम्बे नर्सिंग होम ॲक्टचे उल्लंघन झाल्यामुळे रुग्णालयाची नोंदणी रद्द करून ऑपरेशन थिएटर सील करण्यात आले आहे. या कारवाईमुळे जिल्ह्यातील आरोग्य क्षेत्रात मोठी खळबळ उडाली आहे.

ख्रिस्तानंद हॉस्पिटल हे या भागातील नामांकित व सेवाभावी रुग्णालय म्हणून ओळखले जात होते. ख्रिश्चन मिशनरीतर्फे चालविण्यात येणाऱ्या या रुग्णालयात अल्प दरात उपचार मिळत असल्याने रुग्णांचा मोठा ओघ असायचा. मात्र, या घटनेनंतर प्रशासनाने कठोर भूमिका घेत कारवाई केली आहे.