रेल्वे खांबाला गळफास घेऊन तरुणाची आत्महत्याभांदक येथे मध्य प्रदेशातील कामगाराचा मृत्यू

रेल्वे खांबाला गळफास घेऊन तरुणाची आत्महत्या

भांदक येथे मध्य प्रदेशातील कामगाराचा मृत्यू

भद्रावती : शहरातील भद्रावती रेल्वे स्थानकाजवळील गेट क्रमांक ३६ हद्दीत एका १८ वर्षीय तरुणाने विद्युत खांबाला दुपट्ट्याने गळफास घेऊन आत्महत्या केल्याची घटना उघडकीस आली आहे. ही घटना बुधवारी  पहाटेच्या सुमारास उघडकीस आली.

दुर्गेश प्रसाद मसराम (वय 19) असे या तरुणाचे नाव असून तो मूळचा मध्य प्रदेशातील मंडला जिल्ह्यातील कोको बिच्छया या गावचा रहिवासी होता. तो आपल्या कुटुंबियांसह भांदक परिसरात रेल्वे लाईन व सायडिंगच्या कामासाठी हंगामी मजुरी करण्यासाठी आला होता. तो आपल्या आई-वडिलांसह रेल्वेजवळील झोपडपट्टीत वास्तव्यास होता.

मिळालेल्या माहितीनुसार, बुधवारी पहाटे दुर्गेश घरात नसल्याचे लक्षात येताच कुटुंबीयांनी परिसरात शोधाशोध सुरू केली. यादरम्यान रेल्वे लाईनलगत असलेल्या विद्युत वाहिनी पोल क्रमांक ८५२ B, ३४ AI या खांबावर त्याने मानेला दुपट्टा गुंडाळून आत्महत्या केल्याचे दिसून आले. घटनास्थळी कुटुंबियांसह परिसरातील इतर मजुरांची गर्दी जमा झाली.

घटनेची माहिती मिळताच भद्रावती पोलिसांनी तात्काळ घटनास्थळी भेट दिली. मात्र, ही घटना मध्य रेल्वेच्या हद्दीतील असल्याने पुढील तपासासाठी रेल्वे सुरक्षा दल  ला पाचारण करण्यात आले. आरपीएफचे पथक घटनास्थळी दाखल झाले असून त्यांनी घटनेचा तपास सुरू केला आहे.

मृत तरुणाचा मृतदेह ताब्यात घेऊन शवविच्छेदनासाठी ग्रामीण रुग्णालय भद्रावती येथे हलविण्यात आला आहे. शवविच्छेदन अहवाल प्राप्त झाल्यानंतरच मृत्यूचे नेमके कारण स्पष्ट होऊ शकेल, असे पोलिसांनी सांगितले. प्राथमिक दृष्ट्या ही आत्महत्या असल्याचे दिसून येत असले तरी, अद्याप आत्महत्येमागचे कारण समजू शकलेले नाही.