आंतरराष्ट्रीय पत्रकार संघटनेचे राज्य अधिवेशन पंढरपूरात, २५०० पत्रकारांचा सहभागाची अपेक्षा

आंतरराष्ट्रीय पत्रकार संघटनेचे राज्य अधिवेशन पंढरपूरात, २५०० पत्रकारांचा सहभागाची अपेक्षा

चेतन लूतडे 

वरोरा  : आंतरराष्ट्रीय पत्रकार संघटना ‘व्हॉईस ऑफ मीडिया’ आणि ‘व्ही.ओ.एम. इंटरनॅशनल फोरम’ यांचे राज्य अधिवेशन दि. १५ आणि १६ नोव्हेंबर २०२५ या दिवशीं पंढरपूर येथील श्री श्री राधा पंढरीनाथ मंदिर, इस्कॉन येथे पार पडणार आहे. या अधिवेशनास राज्यभरातील सुमारे अडीच हजार पत्रकार सहभागी होतील अशी अपेक्षा आहे.

कार्यक्रमाचे स्वरूप: हे दोन दिवसीय अधिवेशन प्रत्येक दिवशी सकाळी ९:00 ते रात्री ११:00 वाजेपर्यंत चालेल. कार्यक्रमाला राष्ट्रीय-आंतरराष्ट्रीय पत्रकार, राजकीय मान्यवर आणि सामाजिक क्षेत्रातील व्यक्तिमत्त्वे उपस्थित राहतील. पत्रकारांचे निवास, आरोग्य, संरक्षण यासारख्या मूलभूत समस्यांवर चर्चा होऊन पत्रकारितेची गुणवत्ता उंचावण्यावर भर देण्यात येणार आहे.

धार्मिक आणि आध्यात्मिक महत्त्व: १५ नोव्हेंबर हा एकादशीचा दिवस असल्याने, सहभागी पांडुरंगाचे दर्शन घेऊ शकतील. इस्कॉन मंदिर परिसरातील श्रीकृष्ण मंदिर, चंद्रभागा नदीकाठी असलेला प्रभुपाद घाट इत्यादी ठिकाणे पाहण्याचा या प्रसंगी अनुभव येणार आहे.

संघटनेची ओळख: महाराष्ट्रातून सुरू झालेली ‘व्हॉईस ऑफ मीडिया’ ही संघटना सध्या ५६ देशांमध्ये पोहोचली असून ६ लाख ७० हजार पत्रकार त्यात सदस्य किंवा पदाधिकारी म्हणून कार्यरत आहेत. पत्रकारांसाठीचे हे एक सक्षम व्यासपीठ बनले आहे.

आयोजकांची मदत: या अधिवेशनासाठी इस्कॉन पंढरपूरचे अध्यक्ष प्रल्हाद दास यांचे सहकार्य लाभले आहे. संस्थेचे आंतरराष्ट्रीय अध्यक्ष संदीप काळे, महाराष्ट्र राज्याध्यक्ष अनिल म्हस्के आणि पंढरपूर प्रमुख सुरज सरवदे यांसह इतर अनेक पदाधिकाऱ्यांनी आयोजनास सुरुवात केली आहे.

राज्याचे महासचिव दिगंबर महाले, कार्याध्यक्ष विजय चोरडिया आणि मंगेश खाटीक यांनी या अधिवेशनासाठी निमंत्रित असलेल्या सर्व पत्रकार आणि पदाधिकाऱ्यांनी उपस्थित राहावे, असे आवाहन केले आहे.

********