जागतिक पर्यावरण दिनानिमित्त GWELचा हरित संकल्प; ५०० वृक्षांची लागवड, १.२५ लाख रोपांचा टप्पा पार

जागतिक पर्यावरण दिनानिमित्त GWELचा हरित संकल्प; ५०० वृक्षांची लागवड, १.२५ लाख रोपांचा टप्पा पार

वरोरा | ११ जून २०२६

जागतिक पर्यावरण दिनानिमित्त ५ जून २०२६ रोजी जीएमआर वरोरा एनर्जी लिमिटेड (GWEL) ने विविध शाश्वत उपक्रम राबवत पर्यावरण संवर्धनासाठीची आपली बांधिलकी पुन्हा अधोरेखित केली. कंपनीच्या कर्मचारी व सहयोगी कर्मचाऱ्यांनी या उपक्रमांमध्ये उत्स्फूर्त सहभाग नोंदविला.

कार्यक्रमाचा मुख्य भाग म्हणून प्रकल्प परिसरात चीफ ऑपरेटिंग ऑफिसर (COO) थर्मल श्री. धनंजय देशपांडे यांच्या नेतृत्वाखाली वृक्षारोपण मोहीम राबविण्यात आली. या मोहिमेत तब्बल ५०० रोपांची लागवड करण्यात आली. प्रकल्प परिसरासह आसपासच्या भागात हरित वातावरण निर्माण करण्यासाठी GWEL सातत्याने प्रयत्नशील असल्याचे यावेळी दिसून आले.

पर्यावरण संवर्धनाचा संदेश घराघरांत पोहोचावा यासाठी कंपनीने प्रत्येक कर्मचाऱ्याला दोन रोपे वितरित केली. त्यामुळे कर्मचाऱ्यांनीही आपल्या घराच्या परिसरात वृक्षसंवर्धनात सक्रिय सहभाग घेण्याचा संकल्प केला.

GWELचा पर्यावरणीय दृष्टीकोन केवळ वीज निर्मिती प्रकल्पापुरता मर्यादित नसून, परिसरातील पर्यावरणीय समतोल राखणे आणि जैवविविधतेचे संवर्धन करणे यालाही कंपनी प्राधान्य देते. कंपनीने आतापर्यंत १ लाख २५ हजारांहून अधिक रोपांची लागवड केली असून, यामुळे परिसरातील हरित क्षेत्रात लक्षणीय वाढ झाली आहे.

यावेळी कर्मचाऱ्यांना संबोधित करताना COO थर्मल श्री. धनंजय देशपांडे यांनी पर्यावरण संरक्षण ही केवळ संस्थेची नव्हे तर प्रत्येक नागरिकाची जबाबदारी असल्याचे सांगितले. शाश्वत विकास, संसाधनांचे संवर्धन आणि पर्यावरणपूरक जीवनशैली स्वीकारण्याची गरज त्यांनी अधोरेखित केली.

तसेच घरगुती स्तरावर कचऱ्याचे योग्य वर्गीकरण, पुनर्वापर आणि जबाबदार विल्हेवाट याबाबतही त्यांनी मार्गदर्शन केले. कंपनीच्या शाश्वत कचरा व्यवस्थापन धोरणाची माहिती देत पर्यावरणपूरक उपक्रमांना अधिक चालना देण्याचा निर्धार व्यक्त केला.

संसाधन संवर्धन, कचरा व्यवस्थापन आणि समाज सहभाग या क्षेत्रांमध्ये GWEL सातत्याने कार्यरत असून, जागतिक पर्यावरण दिनानिमित्त राबविण्यात आलेले उपक्रम कंपनीच्या "स्वच्छ, हरित आणि शाश्वत भविष्य" या दृष्टीकोनाचे प्रतिक असल्याचे स्पष्ट झाले.