वरोऱ्यात मटका जुगारावर पोलिसांची धाड; किराणा दुकानदाराविरुद्ध गुन्हा दाखल.

वरोऱ्यात मटका जुगारावर पोलिसांची धाड; किराणा दुकानदाराविरुद्ध गुन्हा दाखल

वरोरा, दि. 27 जून 2026 : वरोरा शहरातील आझाद वॉर्ड परिसरात सुरू असलेल्या मटका जुगारावर वरोरा पोलिसांनी धाड टाकून एका किराणा दुकानदाराला रंगेहात पकडले. आरोपीकडून जुगाराचे साहित्य व रोख रक्कम असा 1,345 रुपयांचा मुद्देमाल जप्त करण्यात आला असून त्याच्याविरुद्ध महाराष्ट्र जुगार प्रतिबंधक अधिनियमाच्या कलम 12(अ) अन्वये गुन्हा दाखल करण्यात आला आहे.

पोलीसांनी दिलेल्या माहितीनुसार, दि. 25 जून 2026 रोजी पोलीस हवालदार संदीप विठ्ठल मुळे व त्यांच्या सहकाऱ्यांकडून जुगार प्रतिबंधक कारवाईसाठी पेट्रोलिंग सुरू असताना गुप्त माहिती मिळाली. त्यानुसार आझाद वॉर्डातील गौरी मसाले अँड किराणा स्टोअर्स दुकानाजवळ एक व्यक्ती मटका जुगारासाठी आकडे लिहून नागरिकांकडून पैसे स्वीकारत असल्याचे समोर आले.

यानंतर पोलिसांनी तातडीने धाड टाकून संशयिताची झडती घेतली असता तो शरद किसनराव वरघणे (वय 55, रा. आझाद वॉर्ड, वरोरा) असल्याचे निष्पन्न झाले.

झडतीदरम्यान आरोपीकडून मटका जुगाराच्या खायवाडीच्या चिठ्ठ्या, 1,340 रुपये रोख रक्कम आणि एक पेन असा एकूण 1,345 रुपयांचा मुद्देमाल जप्त करण्यात आला. ही कारवाई दुपारी 2.53 ते 3.30 या वेळेत करण्यात आली.

याप्रकरणी आरोपी शरद किसनराव वरघणे याच्याविरुद्ध महाराष्ट्र जुगार प्रतिबंधक अधिनियमाच्या कलम 12(अ) अन्वये वरोरा पोलीस ठाण्यात गुन्हा दाखल करण्यात आला असून पुढील तपास वरोरा पोलीस करीत आहेत.