वरोऱ्यात बंद घर फोडून साडेतीन लाखांचा ऐवज लंपास; नागपूरहून परतल्यावर चोरीचा प्रकार उघड.

वरोऱ्यात बंद घर फोडून साडेतीन लाखांचा ऐवज लंपास; नागपूरहून परतल्यावर चोरीचा प्रकार उघड.

वरोरा, दि. 29 जून 2026 :

वरोरा शहरातील गिरीपुंजे कॉलनी, आनंदवन चौक परिसरात बंद घराचे कुलूप तोडून अज्ञात चोरट्यांनी रोख रक्कम व सोन्या-चांदीचे दागिने असा एकूण ₹3 लाख 50 हजारांचा ऐवज लंपास केल्याची घटना उघडकीस आली आहे. या प्रकरणी वरोरा पोलीस ठाण्यात अज्ञात आरोपीविरुद्ध गुन्हा दाखल करण्यात आला आहे.

पोलीसांनी दिलेल्या माहितीनुसार, फिर्यादी उषा सेवकराम बांगडकर (वय 47) या गिरीपुंजे कॉलनी, देशपांडे पेट्रोल पंपासमोर, आनंदवन चौक येथे वास्तव्यास आहेत. त्यांचे पती सेवकराम बांगडकर हे आनंदवन अंध विद्यालयात शिक्षक म्हणून कार्यरत आहेत.

दि. 27 जून रोजी दुपारी 2 वाजता उषा बांगडकर या पतीसह नागपूर येथे शिक्षणासाठी राहणाऱ्या मुलीला भेटण्यासाठी घराला कुलूप लावून गेल्या होत्या. दि. 28 जून रोजी रात्री सुमारे 8.15 वाजता त्या वरोऱ्यात परतल्यानंतर घरी आल्या असता मुख्य दरवाज्याचे कुलूप तुटलेले दिसले. शेजारी राहणारे विजय खरशे यांना बोलावून घरात प्रवेश केला असता बेडरूममधील सामान अस्ताव्यस्त पडलेले आणि कपाट उघडून त्यातील ड्रॉवर बाहेर काढलेले आढळले.

तपासणी केली असता कपाटात ठेवलेली ₹1.50 लाखांची रोख रक्कम, 2 तोळ्यांची सोन्याची पोत (अंदाजे ₹1.20 लाख), 5 ग्रॅमचे सोन्याचे कानातील टाप्स (अंदाजे ₹30 हजार), 3 ग्रॅमचे सोन्याचे डोरले (अंदाजे ₹45 हजार) तसेच 5 तोळ्यांची चांदीची पिंड (अंदाजे ₹5 हजार) असा एकूण ₹3.50 लाखांचा ऐवज अज्ञात चोरट्यांनी चोरून नेल्याचे निदर्शनास आले.

याप्रकरणी वरोरा पोलीस ठाण्यात अज्ञात आरोपीविरुद्ध गुन्हा दाखल करण्यात आला असून पोलीस परिसरातील सीसीटीव्ही फुटेजची तपासणी करत आहेत. पुढील तपास वरोरा पोलीस करीत आहेत.