अकरावीच्या वर्गांवर शिक्षण विभागाची करडी नजर; गैरहजर विद्यार्थी आढळल्यास कॉलेज अडचणीत

अकरावीच्या वर्गांवर शिक्षण विभागाची करडी नजर; गैरहजर विद्यार्थी आढळल्यास कॉलेज अडचणीत

 प्रतिनिधी : राज्यातील कनिष्ठ महाविद्यालयांमध्ये अकरावीच्या प्रवेश प्रक्रियेनंतर विद्यार्थ्यांची प्रत्यक्ष उपस्थिती तपासण्यासाठी शिक्षण विभागाने विशेष मोहीम हाती घेतली आहे. महाविद्यालये सुरू झाल्यानंतर अकरावीच्या वर्गांची अचानक तपासणी केली जाणार असून, विद्यार्थी नियमितपणे वर्गात उपस्थित नसल्याचे आढळल्यास संबंधित कनिष्ठ महाविद्यालयाविरुद्ध कारवाई केली जाणार आहे. गंभीर अनियमितता आढळल्यास महाविद्यालयाची मान्यता रद्द करण्याचा प्रस्तावही शासनाकडे पाठविला जाऊ शकतो.

काय आहे पार्श्वभूमी?

राज्यातील अनेक ठिकाणी काही कनिष्ठ महाविद्यालये आणि खासगी शिकवणी संस्था यांच्या संगनमताने विद्यार्थ्यांचे केवळ महाविद्यालयात नाव नोंदवून त्यांना पूर्णवेळ खासगी क्लासेसमध्ये शिक्षण दिले जाते, अशी तक्रार शिक्षण विभागाकडे सातत्याने येत होती. त्यामुळे अनेक महाविद्यालयांमध्ये विद्यार्थ्यांची उपस्थिती अत्यल्प असल्याचे दिसून आले आहे.

यावर नियंत्रण आणण्यासाठी शिक्षण विभागाने अकरावीच्या विद्यार्थ्यांची प्रत्यक्ष उपस्थिती पडताळण्याचा निर्णय घेतला आहे. यासाठी बायोमेट्रिक हजेरी, वर्ग तपासणी आणि अचानक भेटी यांचा वापर केला जाणार आहे.

अकरावीच्या वर्गात विद्यार्थ्यांची प्रत्यक्ष उपस्थिती

प्रवेश घेतलेल्या विद्यार्थ्यांची संख्या आणि उपस्थिती यातील तफावत बायोमेट्रिक हजेरीची पडताळणी करून,

नियमित अध्यापन सुरू आहे की नाही याची तपासणी करण्यात येणार आहे.

पुणे विभागीय शिक्षण उपसंचालक गणपत मोरे यांनी दिलेल्या माहितीनुसार, शासनाच्या आदेशानुसार आणि शिक्षण संचालकांच्या परिपत्रकानुसार कनिष्ठ महाविद्यालयांमधील विद्यार्थ्यांची उपस्थिती तपासली जाणार आहे. वर्गात विद्यार्थी उपस्थित नसल्यास संबंधित संस्थेला नोटीस बजावली जाईल. तपासणीत गंभीर त्रुटी आढळल्यास मान्यता रद्द करण्याची प्रक्रिया सुरू केली जाईल.

शिक्षण विभागाच्या या कारवाईमुळे ‘डमी अॅडमिशन’ आणि केवळ कागदोपत्री सुरू असलेल्या वर्गांवर आळा बसण्याची शक्यता आहे. तसेच विद्यार्थ्यांचा प्रत्यक्ष शिक्षण प्रक्रियेत सहभाग वाढून शिक्षणाची गुणवत्ता सुधारण्यास मदत होणार आहे.