बुकिंगनंतरही ८ दिवस सिलिंडर नाही; जाब विचारणाऱ्या ग्राहकाला उद्धट वागणूक.वरोऱ्यात स्नेहा गॅस एजन्सीवर ग्राहकांची पिळवणूक केल्याचा आरोप; तहसीलदारांकडे तक्रार.

बुकिंगनंतरही ८ दिवस सिलिंडर नाही; जाब विचारणाऱ्या ग्राहकाला उद्धट वागणूक.

वरोऱ्यात स्नेहा गॅस एजन्सीवर ग्राहकांची पिळवणूक केल्याचा आरोप; तहसीलदारांकडे तक्रार.

वरोरा : शहरातील स्नेहा गॅस एजन्सीच्या कारभाराविरोधात ग्राहकांमध्ये नाराजी वाढत असून, घरगुती गॅस सिलिंडर वितरणातील विलंब, ग्राहकांशी उद्धट वागणूक आणि अतिरिक्त रकमेची मागणी केल्याचे आरोप समोर आले आहेत. या प्रकरणी संबंधित ग्राहकाने तहसीलदारांकडे लेखी तक्रार दाखल केली आहे.

माहितीनुसार, वरोरा येथील रहिवासी सोनारकर यांनी २ जून २०२६ रोजी घरगुती गॅस सिलिंडरसाठी बुकिंग केले होते. बुकिंगनंतर त्यांच्या मोबाईलवर ओटीपी तसेच बिल जनरेट झाल्याचा संदेश प्राप्त झाला. मात्र, तब्बल आठ दिवस उलटूनही सिलिंडर घरपोच न मिळाल्याने त्यांनी थेट एजन्सी कार्यालयात जाऊन चौकशी केली.

यावेळी एजन्सीकडून त्यांची बुकिंग रद्द झाल्याचे सांगण्यात आले. याबाबत अधिक माहिती विचारल्यानंतर एजन्सीचे मालक व कर्मचाऱ्यांनी उद्धटपणे वागणूक दिल्याचा आरोप सोनारकर यांनी केला आहे. या प्रकारामुळे संतप्त झालेल्या ग्राहकाने वरोरा तहसील कार्यालयात धाव घेत तहसीलदारांकडे लेखी तक्रार दाखल केली.

तक्रारीची दखल घेतल्यानंतर संबंधित ग्राहकाच्या घरी सिलिंडर पाठविण्यात आला. मात्र, सिलिंडर पोहोचल्यानंतर बिलाव्यतिरिक्त अतिरिक्त रकमेची मागणी करण्यात आल्याचा आरोप आहे. ग्राहकाने अतिरिक्त पैसे देण्यास नकार दिल्यानंतर वितरणासाठी आणलेला सिलिंडर परत नेण्यात आल्याचेही तक्रारीत नमूद करण्यात आले आहे.

यानंतर पुरवठा निरीक्षक गवई यांनी या प्रकरणाची दखल घेत एजन्सी व्यवस्थापनाशी संपर्क साधला. त्यांच्या हस्तक्षेपानंतर दुसऱ्या दिवशी ग्राहकाच्या घरी सिलिंडर पोहोचविण्यात आला आणि अधिकृत बिलानुसारच रक्कम स्वीकारण्यात आली.

दरम्यान, या संपूर्ण प्रकारामुळे संबंधित ग्राहकाला मोठा मानसिक त्रास सहन करावा लागल्याचे सांगण्यात येत आहे. गॅस वितरणातील अनियमितता, ग्राहकांना दिली जाणारी वागणूक आणि कथित मनमानी कारभार याबाबत प्रशासनाने सखोल चौकशी करून योग्य ती कारवाई करावी, अशी मागणी नागरिकांकडून होत आहे.