वरोऱ्यात घरातून अवैध देशी दारूचा साठा जप्त; महिलेविरुद्ध दारूबंदी कायद्यान्वये गुन्हा दाखल.

वरोऱ्यात घरातून अवैध देशी दारूचा साठा जप्त; महिलेविरुद्ध दारूबंदी कायद्यान्वये गुन्हा दाखल

वरोरा (दि. 29 जून 2026): वरोरा पोलिसांनी अवैध दारूविक्रीविरोधात राबविलेल्या विशेष मोहिमेदरम्यान मालवीय वार्ड परिसरात कारवाई करून एका महिलेकडून देशी दारूचा साठा जप्त केला. या प्रकरणी पायल प्रभाकर सोनानी (वय 37, रा. मालवीय वार्ड, वरोरा) हिच्याविरुद्ध महाराष्ट्र दारूबंदी कायद्यान्वये गुन्हा दाखल करण्यात आला आहे.

पोलीस उपनिरीक्षक मनिश जगन्नाथ तालेवार यांच्या नेतृत्वाखाली पोलीस पथक अवैध धंद्यांवर कारवाईसाठी पेट्रोलिंग करीत असताना मिळालेल्या गोपनीय माहितीच्या आधारे मालवीय वार्ड येथे छापा टाकण्यात आला. पंचांच्या उपस्थितीत पायल सोनानी हिच्या घराची झडती घेतली असता घरातील हॉलमध्ये ठेवलेल्या पिवळ्या रंगाच्या पिशवीत रॉकेट देशी दारू (संत्रा) या ब्रँडच्या 90 मिलीच्या 12 सिलबंद बाटल्या आढळून आल्या.

जप्त करण्यात आलेल्या दारूची अंदाजे किंमत 480 रुपये असून संपूर्ण मुद्देमाल पंचनामा करून जप्त करण्यात आला. त्यापैकी एक बाटली रासायनिक विश्लेषणासाठी (सी.ए.) नमुना म्हणून वेगळी सीलबंद करण्यात आली.

या कारवाईत पंच म्हणून करण भारत चौरसिया व राहुल सुरेश थुल यांनी सहभाग घेतला. पोलीस पथकात पोलीस अंमलदार जितेश चव्हाण व महिला पोलीस अंमलदार दिशा मिश्रा यांचा समावेश होता.

या प्रकरणाचा पुढील तपास वरोरा पोलीस करीत आहेत.