भद्रावतीत तिनपत्ती जुगार अड्ड्यावर पोलिसांची धाड; चार जणांविरुद्ध गुन्हा दाखल

भद्रावतीत तिनपत्ती जुगार अड्ड्यावर पोलिसांची धाड; चार जणांविरुद्ध गुन्हा दाखल

भद्रावती, दि. 16 जून 2026 : भद्रावती शहरातील एका बंद खोलीत सुरू असलेल्या तिनपत्ती जुगार अड्ड्यावर पोलिसांनी मध्यरात्री धाड टाकून चार जुगाऱ्यांना रंगेहात पकडले. या कारवाईत रोख रक्कम व जुगाराचे साहित्य असा एकूण 16 हजार 50 रुपयांचा मुद्देमाल जप्त करण्यात आला.

पोलीस सूत्रांकडून मिळालेल्या माहितीनुसार, जिल्हा गस्त अधिकारी तथा पोलीस उपअधीक्षक सचिन खेते यांना गुप्त बातमीदारामार्फत भद्रावतीतील एका इमारतीत काही इसम पैशावर तिनपत्ती जुगार खेळत असल्याची माहिती मिळाली होती. त्यानुसार 15 जून रोजी मध्यरात्री सुमारे 12.30 वाजताच्या सुमारास पंचांसह पोलिस पथकाने संबंधित ठिकाणी छापा टाकला.

कारवाईदरम्यान चार जण गोलाकार बसून 52 पत्त्यांच्या संचावर पैशाची हार-जीत लावून तिनपत्ती जुगार खेळताना आढळून आले. पोलिसांनी त्यांना ताब्यात घेतले.

अटक करण्यात आलेल्या आरोपींची नावे पुढीलप्रमाणे आहेत –

कार्तिक शरद लेडांगे (23), रा. झाडे प्लॉट, भद्रावती

रोहित बंडुजी ढवस (25), rा. झाडे प्लॉट, भद्रावती

पवन दिवाकर नागपुरे (25), रा. गुरु नगर, भद्रावती

प्रशांत बंडू चुनारकर (32), रा. गवराळा वॉर्ड, भद्रावती

आरोपींकडून रोख रक्कम 16 हजार रुपये व जुगारासाठी वापरण्यात येणारे 52 पत्ते जप्त करण्यात आले. जप्त मुद्देमालाची एकूण किंमत 16,050 रुपये असल्याचे पोलिसांनी सांगितले.

या प्रकरणी आरोपींविरुद्ध महाराष्ट्र जुगार प्रतिबंधक अधिनियमाच्या कलम 4 व 5 अन्वये भद्रावती पोलीस ठाण्यात गुन्हा दाखल करण्यात आला असून पुढील तपास सुरू आहे.