खांबाडा बाजार समितीतील शेडमधून १.७० लाखांची सरकी चोरी; अज्ञात चोरट्यांविरुद्ध गुन्हा दाखल

खांबाडा बाजार समितीतील शेडमधून १.७० लाखांची सरकी चोरी; अज्ञात चोरट्यांविरुद्ध गुन्हा दाखल

वरोरा, दि. १२ जून : तालुक्यातील खांबाडा येथील कृषी उत्पन्न बाजार समितीच्या आवारातील शेडमधून सुमारे ८० पोती सरकी चोरीला गेल्याची घटना उघडकीस आली असून, याप्रकरणी वरोरा पोलीस ठाण्यात अज्ञात चोरट्यांविरुद्ध गुन्हा दाखल करण्यात आला आहे.

मिळालेल्या माहितीनुसार, खापरी येथील रहिवासी रुपेश रामाजी चौधरी हे बालाजी अँग्रो इंडस्ट्रीमध्ये अकाउंटंट म्हणून कार्यरत आहेत. कृषी उत्पन्न बाजार समिती, खांबाडा येथील शेड बालाजी अँग्रो इंडस्ट्रीने भाडेतत्त्वावर घेतले असून त्यामध्ये पांढरकवडा येथील श्याम जिनिंग अँड प्रेसिंग फॅक्टरीची सुमारे १८०० क्विंटल सरकी साठवून ठेवण्यात आली होती.

दि. ९ जून रोजी पहाटे सुरक्षा रक्षकाने फोन करून शेडमधील काही सरकीची पोती चोरीला गेल्याची माहिती दिली. त्यानंतर घटनास्थळी पाहणी केली असता सुमारे ८० पोती सरकी, किंमत अंदाजे १ लाख ७० हजार रुपये, चोरी झाल्याचे निदर्शनास आले.

सुरक्षा रक्षकाने दिलेल्या माहितीनुसार, रात्री १ वाजेपर्यंत तो जागा होता. त्यानंतर पाऊस आणि वीजपुरवठा खंडित झाल्याने तो चौकीत थांबला होता. याच दरम्यान अज्ञात चोरट्यांनी बाजार समितीच्या भिंतीवरून आत प्रवेश करून शेडमधील सरकीची पोती लंपास केल्याचा संशय आहे.

या प्रकरणी वरोरा पोलीसांनी अज्ञात आरोपीविरुद्ध चोरीचा गुन्हा नोंदवून पुढील तपास सुरू केला आहे.