वरोडा पंचायत समितीत अंधार; वीज बिल थकीत, कनेक्शन खंडित.

वरोडा पंचायत समितीत अंधार; वीज बिल थकीत, कनेक्शन खंडित.

वरोडा: शाम ठेंगडी /25/3/26

ग्रामीण भागाची नाळ असलेल्या वरोडा पंचायत समितीत आर्थिक वर्षाच्या शेवटी अंधारच पाहायला मिळाला. सप्टेंबर २०२५ पासून वीजबिल थकीत असल्याने महावितरणने बुधवारी (दि. २५ मार्च) वीजपुरवठा खंडित केला. यामुळे काही काळ कार्यालयीन कामकाज ठप्प झाले होते.

पंचायत समितीचे तब्बल १८० दिवसांहून अधिक काळापासून ५१ हजार ५८० रुपयांचे वीजबिल थकीत होते. वारंवार सूचना देऊनही बिल भरणा न केल्याने महावितरणने ही कठोर कारवाई केली. वीज खंडित झाल्याने संगणकाधारित सर्व कामे, ऑनलाइन सेवा, शासकीय योजनांचा अहवाल सादरीकरण, निधी वितरणासह अनेक महत्त्वाची कामे ठप्प पडली. मात्र, काही वेळाने वीजपुरवठा पूर्ववत करण्यात आला.

आकस्मिक निधी अप्राप्त : पंचायत समितीचे संवर्ग विकास अधिकारी गजानन मुंडकर यांनी ‘तभा’शी बोलताना सांगितले की, पंचायत समितीला मिळणारा आकस्मिक निधी अद्याप प्राप्त झालेला नाही. मार्च संपत आला तरी हा निधी न मिळाल्याने वीजबिल, वाहनांसाठी डिझेल पुरवठा आणि इतर आकस्मिक खर्च करणे अवघड झाले आहे. यामुळे प्रशासनासमोर मोठी अडचण निर्माण झाली आहे.

पंचायत समितीत कामासाठी आलेल्या नागरिकांना या कारवाईमुळे ताटकळत बसावे लागले. अनेकजण निराश होऊन परत गेले. आर्थिक वर्षाच्या अखेरीस अशी कारवाई झाल्याने कामांची गर्दी वाढली असतानाच प्रशासनाला या संकटाचा सामना करावा लागत आहे. नागरिकांनी आकस्मिक निधी त्वरित उपलब्ध करून देण्याची मागणी केली आहे.